Տպել
Johnson & Johnson ընկերությունը տասնամյակներ շարունակ թաքցրել է մանկական փոշու (присыпка) մեջ ասբեստի առկայությունը։ Այս մասին հայտնում է Reuters գործակալությունը։
Գործակալության տվյալներով՝ ընկերությունն կարգավորող մարմիններից այդ տեղեկատվությունը թաքցրել է 1970-ականներից սկսած։ Միաժամանակ, այդ ընթացքում կատարված թեսթերում հաստատվել է առողջության համար վնասակար նյութի առկայությունը, ընդ որում՝ երբեմն «շատ բարձր խտությամբ»։
Reuters-ի հետաքննությունը վկայում է այն մասին, որ ասբեստը Johnson & Johnson-ի փոշու մեջ եղել է դեռևս 1957-1958 թվականներին։
Ընկերությունն ինքը Johnson’s Baby Powder փոշու մեջ ասբեստի հետքերը պարբերաբար գտել է մինչև 2000-ական թվականները։ Սակայն կեղծիքների միջոցով թաքցրել է ուսումնասիրությունների արդյունքները Սննդամթերքների և դեղամիջոցների որակի սանիտարական վերահսկողության վարչությունից (FDA)։
Միաժամանակ, Johnson & Johnson-ի վերջին ժամանակներս արտադրած փոշին կարող է անվտանգ համարվել։
Johnson&Johnson-ը հանդես է եկել Reuters-ի կողմից իրականացված հետաքննության արդյունքների հերքմամբ։ Չնայած դրան՝ հրապարակումից հետո ընկերության շուկայական գինը ընկել է 39,8 մլրդ դոլարով։
Ընթացիկ տարվա օգոստոսին Միսսուրիի դատարանը հաստատել է ատենակալների որորշումն այն մասին, որ Johnson & Johnson-ը պետք է 4,69 մլրդ դոլար վճարի այն կանանց, որոնց մոտ ընկերության արտադրանքում ասբեստի առկայության պատճառով քաղցկեղային հիվանդություններ են առաջացել։
