Տպել
«Կիլիկիա. Առյուծների երկիր» երեք պատմական ֆիլմ-ակնարկները, որոնք ամփոփ, գեղարվեստական մոտեցմամբ հանդիսատեսին հաղորդակից են դարձնում Կիլիկիայի հզորագույն թագավորական դինաստիաների երեքհարյուրամյա պատմությանը, բարձրացավ երևանյան մեծ էկրան: Ֆիլմի պրեմիերան տեղի ունեցավ սեպտեմբերի 12-ին «Կինո պարկ» կինոթատրոնում: Ցուցադրությանը ներկա էր ՀՀ վարչապետ Նիկոլ Փաշինյանը:
Նախաձեռնությունը կյանքի է կոչվել «Գոհար» սիմֆոնիկ նվագախմբի և երգչախմբի հիմնադիր՝ Խաչատուրյան ընտանիքի, մասնավորապես, լիբանանահայ բարերար Հարութ Խաչատուրյանի աջակցությամբ:
«Ավելի քան քսան տարի «Գոհար»-ը ամբողջ աշխարհում ներկայացնում է հայկական երաժշտությունն ու հայոց պատմությունը: Համերգների ժամանակ դահլիճներում մշտապես ծածանվում են Կիլիկիայի դրոշները, մտածեցինք, որ լավ կլինի, եթե դրանք ծածանվեն նաև էկրանից այն կողմ և որոշեցինք ստեղծել վիդեոնյութ Կիլիկիայի մասին: Հետո զարգացրեցինք միտքն ու ֆիլմային մոտեցումը , որը կոչվում է «մուդրիլ»: Համաշխարհային կինոարտադրությունում դա մինչև լիամետրաժ ֆիլմ դառնալու նախագիծ է, որը քննարկվում է»,-պատմեց կինոնկարի ռեժիսոր Աշոտ Առաքելյանը:
Ֆիլմի պրոդյուսեր Սևակ Սերոբեանի խոսքով` ընդամենը քսանհինգ րոպեում սեղմ ցույց են տվել իրենց կատարած աշխատանքը և այն, թե ինչ են կարող անել հետագայում: «Եթե նախաձեռնենք ֆիլմի լիամետրաժ տարբերակը, դրանում տեղ չեն գտնի այն դրվագները, որոնք ներկայացված են կարճամետրաժ ժապավենում»,-նշեց պրոդյուսերը:
Նա շեշտեց, որ մեր պատմությունը շատ հզոր է և ճիշտ աշխատանքի դեպքում այն կարող է հետաքրքրել ամբողջ աշխարհին:
«Մենք առաջին անգամ այս ֆիլմով խոսում ենք թագավորության մասին, ոչ թե մեր ազգի ցավի ու լացի»,-եզրափակեց Սերոբեանը:
Ակնարկների արտադրական ընթացքը թե՛ ժամանակացույցի, թե՛ ծավալի առումով համապատասխանում է լիամետրաժ ֆիլմ ստեղծելու գործընթացին։
Բոլոր նկարահանումները կատարվել են Հայաստանում, սկսած մասշտաբային մարտի տեսարաններից մինչև ծովամարտ, որի նկարահանումները իրականացվել են «Կիլիկիա» նավի վրա։ Ժապավենը հագեցած է հարուստ վիզուալ լուծումներով և համակարգչային գրաֆիկայով:
Ըստ հեղինակների՝ ֆիլմ-ակնարկներում առավելագույնս պահպանված է պատմական հավաստիությունը, սակայն թեմայի մատուցման գեղարվեստական և դրամատուրգիական մասն ապահովելու նպատակով կան պատմական դրվագներ, որոնք ներկայացվել են ռեժիսորի յուրահատուկ ստեղծագործ մոտեցմամբ: Դերասանական կազմն ընտրելիս առաջնային պայման է եղել ոչ թե հայտնի դերասանների մասնակցությունը, այլ պրոֆեսիոնալ և խարիզմատիկ կերպարների ներգրավումը։ Ֆիլմ-ակնարկները նկարահանելիս ստեղծագործական թիմն օգտվել է արխիվներում եղած պատմական նյութերից, համագործակցել պատմաբանի հետ։ Ստեղծագործական թիմը ձգտել է հնարավորինս ճշգրիտ պահպանել և հանդիսականին փոխանցել տվյալ ժամանակաշրջանի շունչը: Ֆիլմ-ակնարկների համար հատուկ երաժշտություն է գրվել, որը ձայնագրվել է «Գոհար» սիմֆոնիկ նվագախմբի և երգչախմբի կատարմամբ:
Առաջին ֆիլմ-ակնարկը ներկայացնում է Կիլիկիայի պատմությունը՝ հիմնադրման օրվանից մինչև ամենաազդեցիկ թագավորներից մեկի` Ռուբինյանների տոհմից սերող Լևոն Մեծագործի գահակալումը:
Երկրորդ ֆիլմ-ակնարկն արտացոլում է 13-րդ դարի իրադարձությունները, Լևոն I թագավորի դուստր Զաբելի, նրա խնամակալ Կոնստանդին Պայլի և Զաբելի ամուսին՝ Հեթումյանների դինաստիայի հիմնադիր Կիլիկիո թագավոր Հեթումի կերպարները, տիրող պալատական բարքերն ու խարդավանքները։
Երրորդը ներկայացնում է 1219-1375 թվականների պատմությունը՝ Լևոն III-ի գահակալման տարիները, չորս կողմից կեղեքվող Կիլիկիան և վերջին թագավոր Լևոն V Լուսինյանին, որի հուղարկավորությամբ էլ ավարտվում է ֆիլմ-ակնարկը։
Մինչ Հայաստանում ցուցադրվելը ֆիլմը ներկայացվել էր Լիբանանի մայրաքաղաք Բեյրութում: Ցուցադրությանն ու քննարկմանը ներկա են եղել Լիբանանի կառավարության անդամներ, պատգամավորներ, հայ համայնքի ներկայացուցիչներ, մտավորականներ, մշակույթի գործիչներ։
