Տպել
Այսօր նա համարվում է ոչ միայն հնդկական, այլեւ հոլիվուդյան ֆիլմերի աստղ: Նրա արտաքինը հրապուրում է հազարավոր տղամարդկանց եւ դառնում նույնքան կանանց նմանակման առարկան: Տարիներ են անցել այն օրվանից, երբ նա նվաճել է «Միսս աշխարհ» մրցույթի տիտղոսը, բայց նրան մինչ օրս համարում են աշխարհի գեղեցկուհի:
Իհարկե, խոսքը բոլիվուդյան դերասանուհի, մոդել եւ տիտղոսակիր գեղեցկուհի Այշվարիա Ռայի մասին է: Նրան հաճախ հիշում ենք մեր նյութերում՝ ներկայացնելով ինքնատիպ կերպարներն ու ստեղծագործական նվաճումները, իսկ այսօրվա անդրադարձի թեման դերասանուհու տարեդարձն է: Նոյեմբերի 1-ին, Այշվարիա Ռայը նշեց ծննդյան 46-ամյակը՝ շարունակելով փայլել իր արտաքին հմայքով եւ իր գեղեցկությամբ «փրկելով» աշխարհը:
NEWS.am STYLE-ը ձեր ուշադրությանն է ներկայացում հանրահայտ դերասանուհու տարբեր մեջբերումները՝ գեղեցկության, կյանքի ու կարիերայի մասին:
«Կյանքը, վաղ, թե ուշ, բոլորիս հետ էլ իր հաշիվները մաքրելու է: Մենք վիրավորվում ենք, ծերանում…Տխուր է, երբ փորձում ենք փախչել այդ իրականությունից: Արտաքին գեղեցկությունն ամեն ինչ չէ: Ես միշտ չէ, որ գեղեցիկ եմ լինելու»:
«Կյանքի ցանկացած փուլում դու կարող ես քաշ հավաքել, եւ դա բնական է: Ճիշտ չէ կենտրոնանալ դրա վրա»:
«Նրբագեղությունը բնածին է: Այն ինդիվիդուալ է եւ ժամանակ չի ճանաչում ու դիմակայում է ժամանակի բոլոր փորձություններին»:
«Լավ բան է կարեւոր լինելը, բայց ավելի կարեւոր է լինել լավը»:
«Կյանքը բեմ է, իսկ մենք՝ դերասաններ, այնպես որ՝ պետք է լավ կատարենք մեր դերերը»:
«Քեզ հանդիպած 100 մարդուց առնվազն տասը քեզ չեն սիրելու: Ապրում ես եւ հասկանում, որ երբեք բոլորին չես կարող գոհացնել»:
«Ես մասնագիտացել եմ՝ որպես ճարտարապետ եւ չէի ծրագրում հայտնվել ֆիլմերում: Դերասանությունն ինձ համար այլ մասնագիտություն է, դա իմ աշխատանքն է, որին ես լրջորեն եմ մոտենում»:
«Ես չեմ կարծում, թե ինչ-որ մեկին պարտավոր ես բացատրություններ տալ: Ոչ ոք այդչափ կարեւոր չէ»:
«Ես սովորական կին եմ, որն ունի իր սովորական խնդիրները»:
«Ես միշտ եմ իմացել, որ հաջողակ եմ լինելու, այնպես որ, երբ դա պատահեց, ես չզարմացա»:
