Տպել
ԱՄՆ և Մեծ Բրիտանիայի գիտնականներն աշխարհի երկրների իշխանություններին կոչ են անում արգելել ծխախոտների ֆիլտրերի օգտագործումը, քանի որ դրանք հսկայական վնաս են պատճառում մարդուն և շրջակա միջավայրին։
Ինչպես գրում է British Medical Journal-ը, ցելյուլոզի ացետատային մանրաթելերից պատրաստված ֆիլտրերն անվտանգ չեն։ Ավելին, դրանք մարդկանց ստիպում են ավելի ուժեղ ներքաշել ծուխը և ավելի շատ թվով ծխախոտ ծխել, ինչը լուրջ սպառնալիք է մարդկանց առողջության համար։
Ամերիկացի և բրիտանացի գիտնականները կարծում են, որ ֆիլտրերի ներդրումը տնտեսական շահ է ապահովել ծխախոտ արտադրողներին. շնորհիվ ֆիլտրերի ծխախոտի չափերը մեծացել են, և դրանք սկսել են արտադրել ավելի մեծ քանակությամբ, քան առաջ։
Մեկ այլ խնդիր է այն, որ ֆիլտրերը վնաս են հասցնում ոչ միայն մարդուն, այլ նաև էկոհամակարգին։ Ծխախոտի «մնացուկները» հողում չեն քայքայվում, ուստի դրանք կարելի է ներառել սև ցուցակում՝ մեկանգամյա պլաստիկե փաթեթների հետ միասին, համոզված են գիտնականները։
