Տպել
Որոշ մթերքներ օգտակար են համարվում, սակայն իրականում դրանք վնասակար են: Այս մասին «Կոմսոմոլսկայա պրավդա»-ին հայտնել է «Առողջ սնունդ» ազգային հետազոտական կենտրոնի (ՌԴ) փորձագետ Զինայիդա Մեդվեդևան: Նա թվարկել է 5 նման մթերք:
Ցուցակում կարևոր տեղ են զբաղեցնում պրոտեինային բատոնները: Մասնագետի խոսքով՝ դրանցում բացի չոր պրոտեինից, չորացրած հատապտուղներից, ընկույզից և արևածաղկից, հաճախ պարունակվում են նաև հացահատիկային փաթիլներ շաքարի մեծ քանակությամբ:
Վիտամիններով սպորտային խմիչքները ևս չի կարելի օգտակար համարել՝ պնդում է մասնագետը: Դրանցում մեծ քանակությամբ գլյուկոզա և ֆրուկտոզա է պարունակվում՝ 300 գրամ ջրին 30 գրամ գլյուկոզա:
Մասնագետի խոսքով՝ մրգային հավելումներով յոգուրտները ևս օգտակար չեն, ինչպես կարող էր թվալ: Դրանցում գրեթե չկան վիտամիններ, կան քաղցր հավելումներ և պյուրե, որում մեծ քանակությամբ շաքար կա: Մասնագետը խորհուրդ է տալիս գնել պարզ հունական յոգուրտ առանց հավելումների և համերի և ավելացնել մրգեր:
Մասնագետը նաև կոչ է անում հրաժարվել վերամշակված կարմիր մսից՝ նրբերշիկ, երշիկ, ապխտած կրծքամիս: Դրանք կարող են հանգեցնել հաստ աղիքի քաղցկեղի զարգացմանը: Ավելին, սովորական միսը քաղցկեղածնության տեսանկյունից վնասակար է գրեթե նույնքան, միևնույն ժամանակ, այն բարձրացնում է սրտանոթային հիվանդությունների զարգացման ռիսկը:
Մասնագետի խոսքով՝ կարմիր միսը պետք է ուտել շաբաթական մեկ անգամից ոչ ավել և պատրաստել 60-70 աստիճանի տակ:
Եվս մեկ վնասակար մթերք է կարագը: Մասնագետի խոսքով՝ չի կարելի ուտել օրական 10 գրամից ավել կարագ, այլապես օրգանիզմում կբարձրանա խոլեստերինի մակարդակը, ինչպես նաև անոթներում վահանիկներ կառաջանան, կվատանա սրտանոթային համակարգի աշխատանքը, կխախտվի արյան մատակարարումը: Բացի այդ, կբարձրանա ինսուլտի և ինֆարկտի զարգացման ռիսկը:
