Տպել
Kitchenmag.ru կայքը գրում է, որ, երբ փորձում եք նիհարել, շատ կարևոր է, թե ինչ եք ուտում հատկապես երեկոյան ժամերին, քանի որ նյութափոխանակությունն այդ ժամին դանդաղում է, և յուրաքանչյուր կտոր կարող է վերածվել որովայնի հատվածում ավելորդ կիլոգրամների: Սակայն դա չի նշանակում, որ ընթրիքը պետք է բաղկացած լինի միայն գազարից և բրոկոլիից: Ճիշտ մթերքների ընտրության և ապիտակուցների, ածխաջրատների ու ճարպերի հավասարակշռության դեպքում կարող եք վայելել համը՝ առանց խղճի խայթի:
Սկսեք աղցանից: Վիտամինների, հանքանյութերի և բջջանյութի մեծ քանակ ստանալու համար ընթրիքը սկսեք պարզ բանջարեղենային աղցանից՝ պատրաստված թարմ բանջարեղենից: Փենսիլվանիա նահանգում անցկացված ուսումնասիրությունները ցույց են տվել, որ նրանք, ովքեր ընթրիքը սկսում են աղցանից, 12 տոկոս քիչ կալորիա են օգտագործում: Սա օգնում է կառավարել ախորժակը և հեռու մնալ գիշերն ուտելուց:
Սպիտակուց ավելացրեք: Հավի, խոզի, գառի միս, լոբազգիներ… մեծ հաշվով ձեր օրգանիզմի համար միևնույն է, թե սպիտակուցի աղբյուրներից որ մեկը կընտրեք: Սպիտակուցը կփոքրացնի ախորժակը և երկար ժամանակով հագեցածության զգացում կպարգևի, քան ածխաջրերը: Մի մոռացեք կաթնամթերքի մասին: Nutrition ամսագրում հրապարակված հետազոտություններից մեկում նշվում էր, որ կաթնամթերքի սպիտակուցներն օգնում են զսպել քաշի շատ ավելացումը և արդյունավետորեն մասնակցում են մկանային զանգվածի ձևավորմանը:
Ձավարեղեն օգտագործեք: Առողջ և նիհար լինելու համար պետք է նախապատվություն տալ նաև ձավարեղենին՝ հնդկաձավար, շագանակագույն բրինձ և այլ չմշակված մթերքներ: Հետազոտություններից մեկի ընթացքում պարզվել էր, որ չմշակված ձավարեղեն օգտագործողների մոտ որովայնի հատվածում նիհարելն ավելի արագ էր տեղի ունենում, քան նրանց մոտ, ովքեր ռաֆինացված մթերք են օգտագործում: Ձավարեղենը հարուստ է մագնեզիումով, հանքանյութերով, որոնք մեծ դեր են ունենում ճարպերի յուրացումը կանոնավորելու գործում:
Մի մոռացեք դեսերտի մասին: Այն պնդումը կարող է կասկածելի թվալ, սակայն ի՞նչը կարող է ավելի պարզ լինել, քան հետևել դիետայի, որը ներառում է մի փոքր քաղցր վայելք: Հետազոտությունների արդյունքները ցույց են տալիս, որ քաղցր մթերքներից ամբողջությամբ հրաժարվելը կարող է շատ ուտելու պատճառ դառնալ:
Պահպանեք սպիտակուցների, ճարպերի, ածխաջրատների հավասարակշռությունը: Դիետա պահպանելու ընթացքում շատ հաճախ շեշտը դրվում է օգտագործվող մթերքի կալորիականության վրա, սակայն սննդի 3 հիմնական բաղադրիչների ճիշտ հավասարակշռությունը ճիշտ ընթրիքի գլխավոր պահանջներից մեկն է: Մեր ընթրիքի կալորիաների 45-55 տոկոսը պետք է գա ածխաջրատներից, 20-25 տոկոսը՝ սպիտակուցներից, և 15-25 տոկոսը՝ ճարպերից:
Հետևեք ժամանակին: Դիետոլոգները խորհուրդ են տալիս ընթրիքի ժամն ընտրել՝ կապված կեսօրից հետո թեթև նախաճաշիկի ժամվա հետ: Պետք է ընթրել կեսօրից հետո՝ թեթև նախաճաշիկից 2-3 ժամ անց:
