Տպել
Վրաստանի անունը հիշատակվում է ԱՄՆ Կոնգրեսի երկու պալատների հաստատած 2021-ի պաշտպանական բյուջեում: Դա նշանակում է, որ միջոցների մի մասն ուղղվելու է Վրաստանի անվտանգության ամրապնդմանը: Տարեկան շուրջ 730 միլիարդ դոլար կազմող ԱՄՆ ռազմական բյուջեից 69 միլիարդը հատկացվում է արտերկրում գործողությունների իրականացմանը:
Արեւմտյան փորձագետներից ոմանց կարծիքով ամերիկյան նոր վարչակազմը կարող է օգնել Վրաստանին մոտ ապագայում անդամագրվելու ՆԱՏՕ-ին: Փաստաթղթում նաեւ հիշատակվում է 2008-ի ՆԱՏՕ-ի բուխարեստյան վեհաժողովը, ըստ որի Բրյուսելը ողջունում էր հյուսիսատլանտյան բլոկին միանալու՝ Թբիլիսիի եւ Կիեւի ձգտումերը՝ հավաստիացնելով, որ նրանք դառնալու են դաշինքի անդամ:
Եվրոպայում ԱՄՆ ցամաքային զորքերի նախկին հրամանատար գեներալ-լեյտենանտ Բեն Հոջեսը վրացական հանրային հեռուստաընկերության եթերում հայտարարել է, որ Վրաստանի հյուսիսատլանտյան ապագան յոթ սարի հետեւում չէ:
«ՆԱՏՕ-ին Վրաստանի անդամագրվելը հազիվ թե հրահրի ռուսներին: Միակ բանը, որ կարող է ռուսներին հրահրել՝ Եվրոպայի թուլացումն է»,-զգուշացրել է Հոջեսը՝ ապա թվարկել ռուսական ներխուժումները. Վրաստան, Ղրիմ, Դոնբաս, Մերձդնեստր, խաղաղապահ ուժերի տեղակայում Լեռնային Ղարաբաղում (Արցախում) եւ այլն։ «Այդ ամենը տեղի ունեցավ, երբ ԱՄՆ-ը կտրուկ կրճատեց իր ռազմական ներուժը Եվրոպայում, Եվրոպայում էլ կրճատեցին իրենց ռազմական ներուժը»:
Հոջեսը պնդում է, որ ԱՄՆ նորընտիր նախագահ Բայդենի վարչակազմը պիտի շարունակի ճնշում գործադրել Ռուսաստանի վրա եւ դա անի Գերմանիայի ու Ֆրանսիայի աջակցությամբ։ Այս երկու երկրները համարում են, որ Վրաստանն այժմ պատրաստ չէ դառնալու ՆԱՏՕ-ի լիիրավ անդամ, հետեւաբար խնդիրը Փարիզին ու Բեռլինին տարհամոզելն է:
Վրացի փորձագետների կարծիքով՝ գեներալ Հոջեսի եւ նմանօրինակ նախաձեռնությունները դեռ կմնան որպես հռչակագրեր կամ կարգախոսներ, քանի դեռ այն չի հնչել ԱՄՆ պետական մակարդակով: Սակայն ԱՄՆ-ն ինքը հազիվ թե Թբիլիսիին ներքաշի ՆԱՏՕ-ի կազմ. նման գործընթացների նախաձեռնողը պիտի հենց Վրաստանը լինի եւ դրա համար պահանջվելու է վրացական քաղաքական ուժերի համախմբում, ինչը դեռեւս հեռու է իրականությունից։
