Տպել
British Medical Journal-ում հրապարակված նոր գլոբալ հետազոտության համաձայն՝ դիմակ կրելն իսկապես միլիոնավոր կյանքեր է փրկում:
Medportal.ru-ի փոխանցմամբ՝ Ավստրալիայից, Մեծ Բրիտանիայից եւ Չինաստանից մի խումբ գիտնականներ վերլուծել են տարբեր երկրների 72 հետազոտություններ, որոնք գնահատել են դիմակ կրելու, ձեռքերը լվանալու եւ սոցիալական հեռավորության պահպանության պաշտպանիչ ազդեցությունը։ 35 գիտական աշխատություններում հետազոտվել են առանձին կանխարգելիչ միջոցառումներ, 37-ում՝ ընդհանուր բոլոր միջոցառումները։ Դրանց մասնակցել է մոտ կես միլիոն մարդ, այդ թվում՝ հաստատված COVID-19-ով։
Ինչպես պարզվել է, հասարակական վայրերում դիմակ կրելը 53 տոկոսով նվազեցնում է վարակվելու հավանականությունը։ Սոցիալական հեռավորությունը նվազեցնում է ռիսկը 25 տոկոսով։ Ձեռքերի լվացումը եւս 53 տոկոս արդյունավետություն է ցույց տվել, սակայն մետավերլուծության հեղինակներն այս արդյունքները վիճակագրորեն աննշան են համարել, քանի որ այս կանխարգելիչ միջոցը շատ քիչ է գնահատվել եւ վերջնական եզրակացությունների համար տվյալները բավարար չեն եղել:
Հետազոտության հեղինակներին չի հաջողվել ամբողջությամբ գնահատել այնպիսի միջոցառումները, ինչպիսիք են լոքդաունը, սահմանների, դպրոցների եւ հանրային տարածքների փակումը` ուսումնասիրությունների դիզայնի եւ որակի լուրջ տարբերությունների պատճառով: Նաեւ վերլուծված ուսումնասիրություններում տվյալներ չեն եղել տարբեր տեսակի դիմակների արդյունավետության մասին։
