Տպել
Ախորժակի վրա ներգործելու նպատակով հնարավորինս շատ բանջարեղեն ուտելու փորձերը կարող են հանգեցնել սննդակարգի խախտումների ու ավելի շատ վնասակար մթերք ուտելու ցանկություն առաջացնել։ Այս մասին URA.Ru-ի հետ զրույցում ասել է ներզատաբան, սննդաբան Ալեքսեյ Կալինիչևը։
Մասնագետի խոսքով՝ եթե մարդն անցում է կատարում այսպես կոչված բանջարեղենային սննդակարգին ու անհրաժեշտ ածխաջրերն ու կալորիաները փոխարինում է մանրաթելերով, ապա ախորժակը կարող է էլ ավելի մեծանալ։ Նման դեպքերում օրգանիզմը ձգտում է ստանալ պակասող օգտակար նյութերը ցանկացած սննդից, այդ թվում նաև վնասակար։
«Ըստ էության՝ դուք ջուր եք խմել կամ խոտ եք ծամել։ Այսինքն՝ պարզապես մանրաթելեր եք ստացել և վերջ։ Իսկ որտեղի՞ց պետք է կալորիա ստանաք, չէ՞ որ առանց դրանց հնարավոր չէ ապրել, քանի որ էներգիա է հարկավոր։ Թխուկներից ու կոնֆետների՞ց։ Այսինքն՝ ինքներդ ձեզ խաբել եք ու նորմալ չեք սնվել։ Դասական ճաշը բաղկացած է լինում բարդ ածխաջրերից, սպիտակուցներից ու ճարպից, որն էլ պայմանականորեն կլինի բուսական կամ կենդանական ծագման։ Հակառակ դեպքում ի վերջո մարդը միայն ճարպակալում ու շաքարային դիաբետ կստանա», – բացատրել է մասնագետը։
Կալինիչևի խոսքով՝ սննդակարգի նմանատիպ խախտումների դեպքում անգամ քաշի դեֆիցիտի պարագահում կարող է նկատվել ճարպային հյուսվածքների ավելցուկ, ինչը մասնագետներն անվանում են Skinny Fat։
