Սոցիոլոգները հաշվարկել են, թե քանի մարդ զուգընկեր գտնելու հետ կապված խնդիր ունի

Մոտավորապես յուրաքանչյուր չորրորդ մարդն ունի ինտիմ զուգընկեր գտնելու և ունենալու հետ կապված դժվարություններ, ցույց է տվել Նիկոսիայի համալսարանի սոցիոլոգների հետազոտությունը: Գիտնականների աշխատանքը հրապարակվել է Evolutionary Psychology ամսագրում։

Հետազոտությանը մասնակցել է ավելի քան 7 հազար մարդ Ավստրիայից, Բրազիլիայից, Չինաստանից, Հունաստանից, Հունգարիայից, Իտալիայից, Ճապոնիայից, Պերուից, Լեհաստանից, Ռուսաստանից, Իսպանիայից, Թուրքիայից, Մեծ Բրիտանիայից և Ուկրաինայից։ Մասնակիցները լրացրել են հարցաթերթիկ, որտեղ գնահատել են իրենց սեռական կյանքի մասին պնդումները 1-ից 5 բալանոց սանդղակով: Նրանք նաև հայտնել են իրենց հարաբերությունների կարգավիճակը և միայնության մակարդակը, որը զգացել են հարաբերություններից առաջ, ընթացքում և հետո:

Այսպիսով, մասնակիցների մեկ երրորդը դժվարություններ է ունեցել ինտիմ հարաբերությունների հետ կապված, կեսը խոստովանել է, որ դժվարություններ է ունեցել հարաբերություններ սկսելու հարցում, իսկ մասնակիցների 38%-ը նշել է, որ դժվարություններ է ունեցել հարաբերությունները պահպանելու հարցում:

Այս արդյունքները լայնորեն տարբերվում էին տարբեր մշակույթներում: Օրինակ, չինացիների 19%-ը նշել է, որ դժվարանում է ինտիմ հարաբերություններ սկսել՝ ի տարբերություն ճապոնացիների ավելի քան 60%-ի: Հատկանշական է, որ շատ երկրներում մասնակիցների ավելի քան 40%-ը դժվարություններ է ունեցել ինտիմ հարաբերություններ սկսելու հարցում:

Մասնակիցների մոտ 38%-ը նշել է, որ միայնակ է, 13%-ը՝ ոչ իր կամքով, 15%-ը՝ իր կամքով։ Իսկ ավելի հաճախ միայնակ էին երիտասարդները։