Տպել
Ուրբաթ ԱՄՆ-ում երդվյալ ատենակալների դատարանը եզրակացրել է, որ Tesla-ի գործադիր տնօրեն Իլոն Մասկը եւ նրա ընկերությունը պատասխանատվություն չեն կրում ներդրողներին մոլորության մեջ գցելու համար, երբ Մասկը 2018-ին Twitter-ում գրել է, որ «ֆինանսավորումն ապահովված է» էլեկտրաքարեր արտադրող ընկերության սեփականաշնորհման համար, հաղորդում է Reuters-ը։
Հայցվորները պահանջել են միլիարդավոր դոլարների փոխհատուցում, եւ այդ որոշումը նույնպես կարեւոր էր համարվում Մասկի համար, ով հաճախ է մտնում Twitter՝ իր կարծիքը հայտնելու համար:
Երդվյալ ատենակալները միաձայն վճիռ են կայացրել բանավեճերի սկսվելուց մոտ երկու ժամ անց։
Մասկը դատարանում ներկա չէր դատավճռի հրապարակմանը, բայց շուտով Twitter-ում գրել է, որ «խորապես գնահատում է» որոշումը։
Tesla-ի բաժնետերերը պնդում են, որ Մասկը մոլորության մեջ է գցել իրենց, երբ 2018 թվականի օգոստոսի 7-ին Twitter-ում գրել է, որ քննարկում է ընկերության սեփականաշնորհումը մեկ բաժնետոմսի դիմաց 420 դոլարով՝ ասելով, որ «ֆինանսավորումն ապահովված է»։
Ըստ բաժնետերերի՝ Մասկը ստել է, երբ այդ օրը ավելի ուշ Twitter-ում գրել է, որ «ներդրողների աջակցությունը հաստատված է»։
Վերջին ամիսներին Մասկի ուշադրությունը բաժանվել է Tesla-ի, SpaceX-ի եւ այժմ Twitter-ի միջեւ: Tesla-ի ներդրողները մտահոգություն են հայտնել, որ նա չափազանց մեծ ուշադրություն է դարձրել սոցիալական ցանցերում ընկերության կառավարմանը։
