Տպել
Նյարդաբան և հոգեթերապևտ Օլգա Գոլուբինսկայան թվել է այն հիվանդությունները, որոնց մասին կարող է հուշել քրոնիկ հոգնածությունը, գրում է РИА Новости-ն։
Մասնագետի խոսքով՝ եթե մարդն իսկապես հոգնած է մտավոր կամ ֆիզիկական ակտիվությունից հետո, ապա բոլոր տհաճ զգացողությունները պետք է անհետանան հանգստից հետո, մինչդեռ եթե հոգնածության զգացումը պահպանվում է անգամ լիարժեք հանգստից և անգամ տևական արձակուրդից հետո, ապա հարկավոր է դիմել մասնագետին:
Ըստ նյարդաբանի՝ քրոնիկ հոգնածությունը հաճախ է նկատվում շաքարային դիաբետով կամ վահանագեղձի ախտաբանություններով հիվանդների մոտ։ Բացի այդ, այս ախտանշանը կարող է վկայել նաև հոգեբանական խնդիրների, այդ թվում՝ ընկճախտի սկզբնական փուլերի և սոմատոֆորմ խանգարման մասին։
Նման դեպքերում մասնագետը խորհուրդ է տվել անպայման ուշադրություն դարձնել հոգնածությանն ուղեկցող այլ ախտանշաններին, օրինակ՝ ախորժակի կորստին, քնի հետ կապված խնդիրներին, հետաքրքրության կորստին և այլն։
