Տպել
Շոտլանդիայի բնակչության մեծամասնությունը հանդես է գալիս տարածաշրջանը Միացյալ Թագավորության կազմում պահպանելու օգտին: Այդ մասին հայտնել է Times թերթը, որը հրապարակել է YouGov սոցիոլոգիական ծառայության հարցման արդյունքները:
Նրա տվյալներով՝ Շոտլանդիայի անկախության նոր հանրաքվեի անցկացման դեպքում ընտրողների 57 տոկոսը կպաշտպանի ստստուս քվոյի պահպանումը, ընդսմին ինքնիշխանության օգտին հանդես է գալիս հարցվածների 43 տոկոսը: Հարցումն անցկացնելիս հաշվի չեն առնվել դրա այն մասնակիցները, որոնք դեռևս չեն կողմնորոշվել իրենց ընտրության հարցում:
Մինչդեռ Մեծ Բրիտանիայի հպատակների երկու երրորդը դեմ է արտահայտվում Շոտլանդիայի անկախության երկրորդ հանրաքվեի անցկացմանը: Այդ մասին հայտնել է Sky news բրիտանական հեռուստաալիքը՝ հղում անելով սեփական հարցման արդյունքներին: Դրանց համաձայն, երկրորդ հանրաքվեի հեռանկարին բացասաբար է վերաբերվել հարցվածների 65 տոկոսը, դրականորեն՝ 30 տոկոսը, ևս 5 տոկոսը չեն կարողացել միանշանակ պատասխան տալ:
Շոտլանդիայի առաջին նախարար Նիկոլա Սթերջենը մարտի 13-ին հայտարարե է, որ ինքը կխնդրի տարածաշրջանային խորհրդարանի թույլտվությունը անկախության շուրջ կրկնական հանրաքվե անցկացնելու համար, քանի որ շոտլանդացիների մեծամասնությունը դեմ է արտահայտվել «Brexit»-ին և ցանկանում է մնալ Եվրամիության կազմում:
Սթերջենի խոսքով՝ ինքը կցանկանար քվեարկությունն անցկացնել 2018 թվականի աշնան և 2019 թվականի գարնան միջև ընկած ժամանակաշրջանում:
Շոտլանդիայում համաձայն չեն ԵՄ-ին Մեծ Բրիտանիայի անդամակցության շուրջ անցկացված հանրաքվեի արդյունքներին: Շոտլանդացիների մեծամասնությունը՝ 62 տոկոսը, 2016 թվականի հունիսին կայացած հանրաքվեի ընթացքում քվեարկել է միությանը Միացյալ Թագավորության անդամակցությունը պահպանելու օգտին:
Սեպտեմբերի սկզբին Սթերջենը հայտնել էր, որ Շոտլանդիայի կառավարությունն սկսել է օրենսդրական բազայի նախապատրաստումը անկախության շուրջ նոր հանրաքվե անցկացնելու համար: 2014 թվականի սեպտեմբերին Շոտլանդիայում արդեն հանրաքվե անցկացվել է Մեծ Բրիտանիայից անկախանալու շուրջ:
Անկախության կողմնակիցներն այն ժամանակ պարտվեցին. շոտլանդացիների 55,3 տոկոսը դեմ քվեարկեց Միացյալ Թագավորության կազմից Շոտլանդիայի դուրս գալուն, հաղորդել է ՏԱՍՍ-ը:
