Տպել
Ներկայացվում են մի քանի խորհուրդները, որոնք կիրառելի են ծառայողական փոխհարաբերություններում: Դրանք հասցեագրված են թե՛ հիմնարկի ղեկավարին, թե՛ աշխատակիցներին:
ԽՈՐՀՈՒՐԴ 1: Աշխատավայր գալով՝ ողջունեք ձեր բոլոր գործընկերներին:
Նրանց ցույց տվեք, որ ուրախ եք կրկին նրանց հետ աշխատանքային օրը սկսելու համար և նրանք անհրաժեշտության դեպքում ձեզանից կարող են օգնություն և աջակցություն ստանալ: Փորձեք միշտ աշխատանքի գնալ հաճույքով և բարձր տրամադրությամբ:
ԽՈՐՀՈՒՐԴ 2: Սովորեք ձեր վարքը կառավարել ցանկացած իրավիճակում:
Եղեք բարյացակամ և քաղաքավարի: Ժպտացեք մարդկանց: Աշխատեք պահպանել ձեր և շրջապատի լավ տրամադրությունը: Հիշեք, որ նաև ձեզանից է կախված ողջ հիմնարկից ստացվող տպավորությունը:
ԽՈՐՀՈՒՐԴ 3: Բոլոր ենթականերին «դուք»-ով դիմելը ծառայողական նորմալ փոխհարաբերությունների պահպանման և աշխատանքային կարգապահության անհրաժեշտ պայման է:
ԽՈՐՀՈՒՐԴ 4: Գործնականում ղեկավարն իր ենթականերին երկու տեսակի ցուցումներ է տալիս: Դրանք են հրամանը և խնդրանքը:
Միշտ չէ, որ այս ցուցումները համապատասխանում են իրավիճակին: Երբեմն սիրալիր խնդրանքի փոխարեն հրաման է արձակվում, իսկ որտեղ հրաման է պետք՝ ցուցումը տրվում է խնդրանքի ձևով:
Հրամանն անհրաժեշտ է կիրառել արտակարգ իրավիճակներում (անվտանգության տեխնիկայի խախտում և այլն): Հրամանի ձևով տրվում են այն հանձնարարությունները, որոնք տվյալ ենթակայի ուղղակի պարտականություններն են: Հրամանի տոնը պետք է քաղաքավարի լինի: Տվյալ ենթակայի պարտականությունների շրջանակի մեջ չմտնող հանձնարարությունները տրվում են խնդրանքի ձևով:
Միշտ պետք է հիշել, որ ենթակաները, հատկապես կանայք, ավելի սիրալիր են ընդունում խնդրանքը, քան հրամանը:
ԽՈՐՀՈՒՐԴ 5: Շնորհակալ եղեք, բայց նաև խստապահանջ:
Ուշադիր եղեք ենթակաների հանդեպ և առիթի դեպքում խրախուսեք նրանց: Սովորական «շնորհակալությունը» հաճախ ավելի մեծ ոգևորություն է առաջացնում, քան ֆինանսական պարգևատրությունը:
Որևէ աշխատողի կարելի է գովել և խրախուսել բոլորի ներկայությամբ, սակայն դիտողություն անել` միայն առանձին:
Աշխատողին պատժելիս հարկավոր է հաշվի առնել նրա տարիքը, սեռը և խառնվածքը:
ԽՈՐՀՈՒՐԴ 6: Աշխատավայրում ստեղծեք բարձր տրամադրություն:
Ձեր աշխատակիցներին «վարակեք» ձեր էներգիայով, լավատեսությամբ, աշխատելու բուռն ցանկությամբ, կենսախնդությամբ: Միևնույն ժամանակ հարկ է հիշել, որ լավատեսությունը պետք է իրական հիմքեր ունենա:
ԽՈՐՀՈՒՐԴ 7: Եղեք ճշտապահ, նշանակված հանդիպումները գրանցեք ծոցատետրում:
Ուշացումները խանգարում են աշխատանքին, իսկ հաճախակի ուշացողները կարող են անվստահելի, անլուրջ մարդու համբավ ձեռք բերել: Ճշտապահությունը վերաբերում է նաև հաշվետվությունների և այլ հանձնարարությունների կատարմանը:
ԽՈՐՀՈՒՐԴ 8: Դուք պարտավոր եք պահել հիմնարկի գաղտնիքները:
Մի՛ քննադատեք ձեր հիմնարկը, հատկապես անծանոթների ներկայությամբ: Երբեք ոչ ոքի հետ մի քննարկեք ձեր ղեկավարի կամ գործընկերների անձնական կյանքին առնչվող հարցեր:
ԽՈՐՀՈՒՐԴ 9: Խոսեք և գրեք գեղեցիկ ու գրագետ:
Գեղեցիկ և բովանդակալից խոսք ունեցող մարդը միշտ լավ տպավորություն է թողնում շրջապատի վրա:
ԽՈՐՀՈՒՐԴ 10: Ուշադրություն դարձրեք ձեր հագուստին:
Գործարար մարդու հագուստը պետք է լինի ժամանակակից, կոկիկ և ամենակարևորը` մաքուր:
Կատարեք ձեր բոլոր խոստումները, որոնք տալիս եք ղեկավարությանը, ենթականերին և այցելուներին:
Զգույշ եղեք նվերներ ընդունելիս: Սիմվոլիկ նվերներից (օրացույց, գիրք, գրիչ, ծաղիկներ, գինի, կոնյակ և այլն) բացի այլ նվերներ ընդունելը ցանկալի չէ:
