Տպել
Եվրատեսիլ 2017 երգի մրցույթում Գերմանիայի ներկայացուցիչ Լևինան իր պաշտոնական պրոմո-շրջագայության շրջանակում ժամանել է Հայաստան: OGAE Armenia-ն (Հայաստանում Եվրատեսիլի պաշտոնական ֆան ակումբ) և The LOFT-ը կազմակերպել էին երգչուհու հանդիպումը լրատվամիջոցների ներկայացուցիչների հետ: Այն անցկացվեց ապրիլի 13-ին «LOFT» ինքնազարգացման և ժամանցի կենտրոնում:
«Ներկայացնելու եմ «Perfect life» երգը: Կարծում եմ՝ կյանքը չի կարող կատարյալ լինել, քանի որ մեզանից յուրաքանչյուրը հաճախ հայտնվում է տհաճ իրավիճակներում, բացասական երևույթների է բախվում: Նման իրավիճակներում անգամ հնարավոր է ինչ-որ դրական բան գտնել: Երգիս միջոցով ցանկանում եմ դրական հույզեր պարգևել մարդկանց»,- նշեց Լևինան:
Նրա խոսքով՝ վերջին տարիներին Եվրատեսիլ երգի մրցույթում Գերմանիան մեծ հաջողություններ չի գրանցել: Երգչուհին հույս հայտնեց, որ այս տարի ինքը կկարողանա ինչ-որ բան փոխել:
Լևինան ընդգծեց, որ այս տարվա մրցույթում բավականին շատ են լավ երգերը, սակայն ինքը հատկապես հավանում է Իտալիայի, Իսպանիայի, Ֆրանսիայի ներկայացուցիչների երգերը, հետաքրքիր ու հաճելի են Հայաստանի, Բելգիայի բալլադները:
«Կարծում եմ, որ Արծվիկը հզոր ձայն ունի: Պետք է խոստովանեմ, որ շատ զարմացա երբ տեսա, թե ինչպես է Արծվիկը կատարում գերմանական ժողովրդական երգը: Հիանալի էր: Որոշեցի ընդունել նրա մարտահրավերն ու երգել Կոմիտասի «Կաքավիկ»-ը, որը շատ գեղեցիկ ու զգացմունքային ստեղծագործություն է, բայց բավականին բարդ»,- շեշտեց նա և ասաց, որ այցելել է Կոմիտասի թանգարան-ինստիտուտ ու մեծ բավականություն ստացել: «Որոշել եմ ավելի մանրամասն ուսումնասիրել Կոմիտասի գործերը»,- ասաց Լևինան:
Հանդիպմանը հանդիսատեսը և մամուլի ներկայացուցիչները հնարավորություն ունեցան իրենց հարցերն ուղղել Լևինային, ինչպես նաև վայելեցին Լևինայի «Perfect life» երգի կենդանի կատարումը։
Լևինան երաժշտությամբ զբաղվում է վաղ տարիքից: Նրա խոսքով՝ դեռ մանկուց սիրել է երգել, համերգներ կազմակերպել պարտեզում, իսկ ինը տարեկանում դաշնամուր նվագել և իր սեփական երգերն է գրել:
Լևինայի երգը երկրպագուները ունկնդրելու հնարավորություն կունենան մրցույթի եզրափակիչ փուլում, որը կկայանա մայիսի 13-ին: «Եվրատեսիլ-2017» երգի միջազգային մրցույթին Հայաստանը կներկայացնի Առաջին ալիքի «Դեպի եվրատեսիլ» մրցույթի հաղթող Արծվիկը: Մրցույթն այս տարի կանցկացվի մայիսի 9-ին, 11-ին եւ 13-ին Կիևում: Արծվիկը ելույթ կունենա մայիսի 9-ին՝ 1-ին կիսաեզրափակչի ընթացքում: Մրցույթն այս տարի կանցկացվի «Տոնենք բազմազանությունը» կարգախոսի ներքո:
