Անակնկալ «Ոսկե ծիրան»-ի կողմից

Հակամշակութային հեղափոխության ընթացքում Միչիգանի Անն Արբոր քաղաքում ծնված The Stooges խմբի հզոր ու հարձակողական ոճի ռոքնռոլը խառնարանի պես պայթեց 60-ականների վերջի երաժշտական համապատկերում: Լսարանի վրա ներգործելով ռոքի, բլյուզի, R&B-ի և ազատ ջազի համակցությամբ՝ խումբն այն սերմերը ցանեց, որոնցից հետագա տասնամյակների ընթացքում երևան եկան փանքը և այլընտրանքային ռոքը:

Ջիմ Ջարմուշի նոր աշխատանքը՝ «Gimme Danger»-ը, բոլոր ժամանակների մեծագույն ռոք խմբերից մեկի՝ The Stooges-ի պատմության ժամանակագրությունն է: Ֆիլմը The Stooges-ի ծնունդը ներկայացնում է երաժշտական, մշակութային, քաղաքական, պատմական համատեքստում և կապակցելով խմբի խիզախումներն ու ձախողումները՝ բացահայտում նրա սկզբնական կոմերցիոն դժվարությունների պատճառները, ստեղծագործական ոգեշնչումները, ինչպես նաև մնայուն ժառանգությունը: