Տպել
Հաղորդավարուհի Գայանե Փայտյանը, ով ընդամենը 15 օր առաջ է մայրացել, այսօր նշում է ծննդյան 43-ամյակը: Life.panorama.am-ի հետ զրույցում Գայանեն նշեց, որ այսօր կյանքի ամենամեծ նվերների հետ է նշում տարեդարձը, ինչը անգնահատելի երջանկություն է:
«Այսպիսի ծննդյան օր երբեք չեմ ապրել, աղջիկներս իմ ամենամեծ նվերներն են, որպիսիք երբեք չեմ ունեցել: Զգացողություններս բացատրել չեմ կարող, ես պարզապես երջանիկ եմ»,- նշեց օրվա հերոսուհին:
Գայանե Փայտյանը խոստովանում է, որ աղջիկների ծնունդից հետո կյանքն ամբողջությամբ փոխվել է.
«Օրվա 99 տոկոսը աղջիկներինս է: Նրանցով եմ զբաղված, քանի որ հիմնականում ես ու ամուսինս ենք զբաղվում նրանց խնամքով, իհարկե, տատիկների օգնությամբ: Կստեմ, եթե ասեմ, հեշտ է միանգամից երկու երախայի խնամքը, բայց ես հասցնում եմ ու ինձ երջանկացնում են այս հաճելի հոգսերը: Փոփոխությունները նաև հոգեպես եմ զգում, երևի հենց սա է մոր զգացողությունները, մոր ապրումներն ու սպասելիքները: Ես էլ մայրական բնազդով զգում եմ նրանց, հասկանում, թե տվյալ պահին ինչու են լաց լինում և ինչ են ուզում»,- հավելեց երջանիկ մայրիկը:
Տարեդարձը Գայանեն կնշի տանը.
«Այսօր, բնականաբար, մենք տանից դուրս չենք գա: Բոլորս միասին կնշենք, սա բացառիկ ու յուրահատուկ տարդարձ է, երբեք նմանը չեմ ունեցել, մենք երբեք չորսով՝ ընտանիքով չենք անցկացրել մեր տարեդարձները, իսկ հիմա ունենք այդ երջանկությունը»,- նկատեց նա:
Զրույցի վերջում Գայանե Փայտյանը նշեց, որ շատերին է շնորհակալ իր կյանքի համար.
«Աստծուն եմ շնորհակալ, որովհետև ամեն ինչ ունեմ: Շնորհակալ եմ ծնողներիս, ամուսնուս, ընկերներիս, բոլորին, ովքեր ինձ հետ են և ինչ-որ չափով ապրել են իմ ուրախություններով կամ տխրություններով: Նաև շնորհակալ եմ այն մարդկանց, ովքեր բացարձակ անտարբեր են եղել իմ նկատմամբ, որովհետև այդ անտարբերությունն ինձ ուժ է տվել ավելի լավը լինել: Բոլորին շնորհակալ եմ, ես ընդհանրապես շնորհակալ մարդ եմ»,- ավարտեց հոբելյարը:
