Տպել
Չնայած ամառային թարմ մրգերի եւ հատապտուղների օգտակարությանը, դրանք պետք է չափի մեջ օգտագործել, «Слово и Дело» ամսագրին ասել է բարձրակարգ բժիշկ, բժշկական գիտությունների թեկնածու Նիկոլայ Մատվեեւը։
Նրա խոսքով՝ շատ մարդիկ փորձում են մրգային դիետայի օգնությամբ ազատվել ավելորդ կիլոգրամներից։ Բայց նման մոտեցումը միայն կարճաժամկետ արդյունք է տալիս։
Պատճառը ածխաջրերի մեծ քանակությունն է մրգերի եւ հատապտուղների մեջ։
«Ժամանակակից բժշկությունն ավելորդ քաշի հիմնական պատճառ է համարում ինսուլինառեզիստենտությունը եւ այսպես կոչված «մետաբոլիկ ախտանշանը»։ Դրանց զարգացումն անմիջականորեն կապված է կերած ածխաջրերի (շաքարի) քանակության եւ սնվելու ռիթմի խախտման հետ։ Այս առումով առավել վնասակար են խուրման եւ դեղձը, հատապտուղներից՝ խաղողը եւ կեռասը»,- ասել է փորձագետը։
Մատվեեւը խորհուրդ է տվել չափավոր օգտագործել դրանք։ Նա նաեւ հիշեցրել է, որ դիաբետ 2-ով տառապողներին այդ մթերքները հակացուցված են։
Նա ցրել է նաեւ առասպելը ֆրուկտոզայի օգտակարության մասին։ Մարդու օրգանիզմը այդ մոնոսախարիդը վերածում է գլյուկոզայի, եւ դրա մեծ քանակությունից տուժում է լյարդը։ Դրա պարունակությամբ առաջատարներն են խնձորը, տանձը, վայրի ելակը եւ խաղողը։
Ամառային մրգերի եւ հատապտուղների մեջ շատ են նաեւ սննդային թթուները։ Առաջատարն, իհարկե, ցիտրուսայիններն են։
Չպետք է մոռանալ, որ ամեն օրգանիզմ ինքնատիպ է, եւ կարող են լինել սննդային ալերգիայի անհատական դրսեւորումներ։
Բժիշկ Մատվեեւն ընդգծել է, որ մրգերի, բանջարեղենների եւ հատապտուղների խորհուրդ տրվող չափաբաժինը օրական 400-500 գրամն է։ Այս քանակությունը թույլ կտա օրգանիզմը հագեցնել օգտակար նյութերով, վիտամիններով եւ բջջանյութով։
