Տպել
Բարեկենդան տոնը հետաքրքիր է ոչ միայն հայաստանցիների, այլև արտասահմանյան զբոսաշրջիկների համար, լրագրողներին այսօր ասաց Երևանի քաղաքապետարանի աշխատակազմի մշակույթի և տուրիզմի վարչության բաժնի պետ Էմին Թորոսյանը:
Փետրվարի 11-ին, ժամը 13։00-ին բոլորը կհավաքվեն Սուրբ Սարգիս եկեղեցու մոտ, իսկ ժամը 13:30-ին կմեկնարկի տոնական երթը, կլինի ազգային երգ ու պար, կհնչեն դհոլ և այլ ազգային գործիքներ։ Մասնակիցները կշարժվեց դեպի Ազատության հրապարակ, որտեղ նրանց իսկական տոն է սպասվում` բազմաթիվ անակնկալներով։ Մասնակիցներին կբաժանվեն ցորենով պարկեր, որտեղ յուրաքանչյուրը բարեմաղթանքներ կգտնի։
Թորոսյանի խոսքով` Երևանի քաղաքապետարանի աշխատակիցները զբոսաշրջային ընկերություններին և մայրաքաղաքում գործող հյուրանոցներին առաջիկա տոների վերաբերյալ տեղեկություն են ուղարկում։
«Մենք մեծ հաճույքով համագործակցում ենք ժողովրդական տոների կազմակերպիչների հետ։ Փորձում ենք այնպես անել, որ տոներն առանձնակի կոլորիտ ունենան և մասշտաբային դառնան», – ասաց Թորոսյանը։
Քաղաքապետարանի ներկայացուցիչը հավելեց, որ Բարեկենդանի օգնությամբ մենք մոտենում ենք մեր պատմությանն ու արմատներին, իսկ աճող սերունդն իսկապես դրա կարիքն ունի։
Պետական կառույցների խնդիրը տոնն ավելի զանգվածային դարձնելն է և այն մարդկանց ավելի լայն շրջանակներին ներկայացնելը։
«Չէ՞ որ զբոսաշրջիկներին միշտ հետաքրքրում է այն ամենն, ինչ կապված է ազգային ավանդույթների հետ», – ավելացրեց նա։
Արարատյան Հայրապետական Թեմի երիտասարդաց տեղեկատվական բաժնի թեմական ծրագրերի համակարգող Հասմիկ Միրզոյանը նշեց, որ տոնի խորհրդանիշերն, ինչպես միշտ ժողովրդական տիկնիկներն են, ազգային մոտիվներով դիմակները, ժողովրդական խաղերը, թատերական ներկայացումները, ծիսական ուտեստները և այլն։
«Ամենակարևորն այն է, որ մասշտաբային այս միջոցառումը կազմակերպվում է հայ երիտասարդության ջանքերով։ Մեզ աջակցում է Երևանի քաղաքապետարանն ու Հայաստանի մշակույթի նախարարությունը», – հավելեց Միրզոյանը։
Այդ օրը Երևանի բոլոր 12 վարչական շրջաններում տոնական միջոցառումներ կանցկացվեն։
Սուրբ Սարգիս եկեղեցու հոգևոր հովիվ քահանա Պետրոս Մալյանն իր հերթին պատմեց տոնի, դրա անցկացման ավանդույթների և ծագման մասին։
«Բարեկենդանի հոգևոր խորհուրդը` բարի կենդանություն և ուրախ կյանք սփռելն է։ Տոնի անվանումը հենց այդտեղից է գալիս», – նշեց Տեր Պետրոսը։
Հայկական Բարեկենդանը, նրա խոսքով, խորհրդանշում է մարդկային երջանկությունն ու հանգստությունը, որը վայելում էին Ադամն ու Եվան։ Սակայն նրանք մեղք գործեցին և արտաքսվեցին դրախտից։ Պատահական չէ, որ Մեծ պահքին հաջորդող առաջին կիրակին` արտաքսմանը, խորհրդանշում է Ադամի` դրախտից արտաքսումը:
Մամուլի ասուլիսի ևս մեկ մասնակից, Հայաստանի մշակույթի նախարարի օգնական Արսեն Գրիգորյանը (ստեղծագործական մականունը` Մրո) ավելացրեց, որ Բարեկենդանն իսկապես ժողովրդական ու սիրված տոն է, որը նախաքրիստոնեական ժամանակաշրջանին է պատկանում։
«Այսօր այն կարևոր իրադարձություն է դարձել Հայ առաքելական եկեղեցու տոնացույցում», – ասաց Մրոն։
Բարեկենդանը Հայ առաքելական եկեղեցին Զատիկին նախորդող Մեծ պահքից առաջ է նշում։
