Toyota-ն «Պրադոն» վերածել է երկտեղանոց ապրանքատար ֆուրգոնի
Advertisement 1000 x 90

Toyota-ն «Պրադոն» վերածել է երկտեղանոց ապրանքատար ֆուրգոնի

Toyota ընկերությունը ներկայացրել է Land Cruiser Prado նորացված արտաճանապարհային ավտոմոբիլի նոր վերափոխակը՝ ապրանքատար ֆուրգոնը, որտեղ մնացել է ուղևորների սոսկ երկու տեղ: Utility Commercial անվանումն ստացած ավտոմոբիլը նախատեսված է ինչպես կարճաբազա տարբերակով, այնպես էլ ստանդատ հինգտեղանոց կատարմամբ:

Այդ ավտոմոբիլի սալոնում նստոցների հետևում տեղադրված է միջնորմ՝ բացվող լուսամուտով, իսկ այնուհետև հարթ հատակ բեռի համար: Կարճաբազա տարբերակի (դրա գաբարիտային երկարությունը 4395 միլիմետր է) ուղեբեռային հատվածամասի ծավալը կազմում է 1584 լիտր, իսկ օգտակար բեռնվածքը՝ 593 կիլոգրամ: Հինգդռնանի վերափոխակում այս ցուցանիշները հասնում են համապատասխանաբար 2216 լիտրի և 756 կիլոգրամի: «Պրադո» ապրանքատար ֆուրգոնն առաջարկվում է սոսկ 180 ձիաուժ հզորությամբ 2,8-լիտրանոց դիզելային շարժիչով և մեխանիկական փոխանցատուփով:

Ավտոմոբիլի համալրումն առավելագույնս պարզեցված է: Արտաճանապարհային ավտոմոբիլի հանդերձումը ներառում է օդորակիչը, հալոգենային ցոլալապտերները, բազկաթոռների գործվածքային հարդարումը և 17-դյույմանոց պողպատե սկավառակները: Նորույթը պատրաստված է Մեծ Բրիտանիայի շուկայի համար: Ավտոմեքենայի գներն սկսվում են 27,5 հազար ֆունտ ստեռլինգից: Սովորական մարդատար Prado-ն կարժենա 33,4 հազար ֆունտ: