«Հիշիր, որ մեռնելու ես». դիզայներ Վահան Խաչատրյանի նոր հավաքածուն

Դիզայներ, հագուստի մոդելավորող Վահան Խաչատրյանը ներկայացրել է իր նոր՝ «Momento Mori. Հիշիր, որ մեռնելու ես»  Գարուն/Ամառ 2017 հավաքածուն:

168.am-ի հետ զրույցում Վահան Խաչատրյանը ներկայացրել էր հավաքածուի «Momento Mori. Հիշիր, որ մեռնելու ես» անվանման և մտահղացման պատմությունը, որն ուղղված է նաև քաղաքական գործիչներին.  ««Հիշիր, որ մեռնելու ես» արտահայտությունն իր ծագումն ու նախապատմությունն ունի: Երբ Հռոմ էր մտնում հաղթանակած գեներալը, կայսրը, նրան դիմավորում էին մեծ փառք ու պատվով, և միշտ նրանց հետևից քայլել է մի մարդ, որը նրանց ականջին շշնջացել է. «Հիշիր, որ մեռնելու ես»: Դա արվել է նրա համար, որպեսզի այդ փառքից նրանք իրենց գլուխը չկորցնեն…»,-  պատմել է դիզայները:

Գանգոսկրեր, մահվան շունչ, տապանաքարերի պատկերներով գործվածքներ-կտորներ, ծաղիկներ և դիմակներ… Լանա Դել Ռեյի  երգերի ներքո ցուցադրությունը ներկայացնող 28 մոդել-կերպարները քայլող արձաններ էին հիշեցնում:  Յուրաքանչյուր երգ իր նշանակությունն ուներ ՝ Born to Die, Dark Paradise և այլն:

Շոուն եզրափակվեց երկու հարսնացուների զգեստներով:  «Դրանք հարսնացուների կերպարներ չէին, այլ գերեզմանատներում լացող մարմարյա արձանների կերպարներ էին», -ասաց  Վահան Խաչատրյանը:

Ինչպես միշտ՝ դիզայների ցուցադրությունը մարդաշատ էր:

Լուսանկարները՝ kamoblog.tv-ի