Տպել
Հունական բաց համալսարանի մասնագետները պարզել են, որ միջերկրածովյան դիետան տարեց հասակում բարերար ազդեցություն է ունենում հոգեկան առողջության վրա։
Հետազոտության շրջանակում վերլուծվել են Արևելյան Ատտիկայի (Հունաստան) տարեց մարդկանց տվյալները։ Նրանց 64 տոկոսը հետևել է միջերկրածովյան դիետային չափավոր, իսկ 34 տոկոսը՝ բարձր աստիճանի։ Փորձարկվողների մեջ ընկճախտի ախտանշաններ հայտնաբերվել են 25 տոկոսի մոտ, ընդ որում՝ ավելի հաճախ կանանց, քան տղամարդկանց մոտ։
Պարզվել է, որ հոգեկան առողջությունն անմիջական կապ ունի սննդակարգի հետ. ընկճախտի առաջացմանն ամենից քիչ ենթակա են նրանք, ովքեր անշեղորեն հետևել են միջերկրածովյան դիետային։ Դա հատկապես վերաբերել է նրանց, ովքեր շատ բանջարեղեն և նվազագույն չափով ալկոհոլ են օգտագործել։
Հետազոտության արդյունքները ներկայացվել են Սան Ֆրանցիկոյում, Ամերիկյան հոգեբանական ասոցիացիայի ամենամյա կոնֆերանսի շրջանակում։
Ավելացնենք, որ միջերկրածովյան դիետան մասնավորապես բնութագրվում է մրգերի, բանջարեղենի, թեփով ցորենի, ընկույզների, ձիթապտղի ձեթի, ձկների և ծովամթերքների օգտագործմամբ։ Ընդ որում՝ ալկոհոլը և միսը պետք է հասցվեն նվազագույնի։
