Տպել
Երևանում «ԷՄՋԻ Մոթորս» ընկերությունը ներկայացրեց լիովին էլեկտրական MG ZS EV քրոսովերը։ MG ZS EV էլեկտրամոբիլը հագեցած է նորագույն անվտանգության և հարմարավետության համակարգերով։ Հայաստանը աշխարհում առաջին երկրներից է, որտեղ հասանելի դարձավ այս մոդելը։
«ԷՄՋԻ Մոթորս» ընկերության մարկետինգի և կորպորատիվ վաճառքների պատասխանատու Հայկ Հարությունյանը նշեց, որ ներկայացվել է վերջին շրջանի ամենահաջողված քրոսովերը, որը արտադրված է չինական ամենամեծ ավտոարտադրող SAIC motors ընկերության կողմից, որի հետ «ԷՄՋԻ Մոթորս»-ը 2019 թվականին պայմանագիր կնքեց։
«Կարելի է ասել հեղափոխություն ենք անում ավտոշուկայում, քանի որ այսուհետ էլեկտական տարբեր մոդելներ են ներկայացված լինելու Հայաստանում՝ բավականին հաջողված և մատչելի։ Մեր քաղաքացիները հնարավորություն կունենան էկոլոգիապես մաքուր, ոչ ծախսատար, ժամանակակից և ապահով մեքենաներով երթևեկել»,- ասաց Հարությունյանը՝ հավելելով, որ մոտ ապագայում այլ մոդելներ նույնպես կցուցադրվեն։
«ԷՄՋԻ Մոթորս» ընկերության մարկետինգի և կորպորատիվ վաճառքների պատասխանատուի խոսքով՝ ընկերությունը մոտ ապագայում կիրականացնի նաև արագ լիցքավորիչ կայանների (Hyper Chargers) տեղադրումը Հայաստանի ողջ տարածքով՝ այդպիսով լիարժեք շղթա ապահովելով էլեկտրոմոբիլների շահագործման համար։
Հարությունյանը լավատեսորեն է տրամադրված Կառավարության կողմից արտոնությունների տրամադրման առնչությամբ։
«Կառավարությունը արդեն իսկ հայտարարել է, որ ծառայողական մեքենաների մի մասը կփոխարինի էլեկտրամոբիլներով։ Հուսանք, որ կօգտվեն մեր մեքենաներից»,- շեշտեց Հարությունյանը։
Նա հայտեց, որ MG ZS EV մակնիշի քրոսովերի մեկ լիցքավորմամբ միջին վազքը կազմում է 330-340 կմ։
«Հաշվի առնելով, որ ՀՀ քաղաքացին միջինում 30-50 կիլոմետր է վարում մեքենան, կարծում եմ, մեկ լիցքավորմամբ մեկ շաբաթ բավարար կլինի այն շահագործել։ Մեքենայի հետ կոմպլեկտում կա նաև լիցքավորիչ, որը կարելի է տան պայմաններում օգտագործել։ Էլեկտրամոբիլը հագեցած է նաև անվտանգության բոլոր համակարգերով»,- ասաց Հարությունյանը։
Երևանի քաղաքապետի տեղակալ Հրաչյա Սարգսյանը նշեց, որ պետք է վերլուծություն անել և հասկանալ, թե ընդհանուր պետական ապարատում տրանսպորտային միջոցների վրա որքան գումար է ծախսվում։
«Կարծում եմ, որ բավականին արդյունավետ կլինի, որպեսզի ունենանք էլեկտրական շարժիչներով մեքենաներ, քանի որ ծախսերը բավականին կնվազեն։ Հնարավորություն կլինի նաև վառելիքի խնայողություն ունենալ, ինչպես նաև կնպաստի օդի աղտոտվածության նվազմանը»,- ընդգծեց Սարգսյանը։
MG վաճառքի գծով տնօրեն Արև Պետրոսյանը նշեց, որ կան մի քանի հարցեր, որոնք մշտապես անհագստացնում են սպառողներին։
«Առաջին հարցը, որ մշտապես անհագստացնում է սպառողներին, կապված է լիցքավորման կայանների հետ։ 2020 թվականին ամբողջ Հայաստանի տարածքում ամեն 100 կմ մեկ տեղադրվելու են լիցքավորման կայաններ։ Մտավախություն կա նաև սպառողների շրջանում, որ կարող է թանկ լինել մեքենաների սպասարկումը։ Միայն մեքենայի մարտկոցի երաշխիքը 8 տարի է, իսկ ամբողջ մեքենային երաշխիքը 5 տարի։ Գնելով MG մեքենաները ստանալու եք ևս մեկ առավելություն։ Ամբողջ Հայաստանի տարածքում մեքենայի կայանումն անվճար է։ Մյուս առավելությունը այն է, որ էլեկտրամոբիլներն ազատվել են ավելացված արժեքի հարկից, նշանակում է դարձել են ավելի մատչելի և հասանելի բոլորին»,- շեշտեց Պետրոսյանը՝ հավելելով, որ բոլոր ցանկացողները կարող են դեկտեմբերի 24-ից գրանցվել մեքենան փորձնական վարելու համար։ Էլեկտրամոբիլի գինն է 16 միլիոն 900 հազար դրամ։
