Տպել
NEWS.am Medicine-ի ընթերցողների մոտ 66%-ը գիրացել է ամանորյա տոների ժամանակ: Այս մասին վկայում են հարցումները, որոնք անցկացվել են կայքի ընթերցողների և Ֆեյսբուքյան էջի հետևորդների շրջանում:
Հարցման համաձայն՝ հարցվածների 33%-ը չի գիրացել տոներից հետո: 44%-ը գիրացել է 1-3 կգ-ով, իսկ 11%-ը՝ ավելի քան 3 կգ-ով: Հարցվածների ևս 11% խոստովանել է, որ վախենում է կշռվել տոներից հետո:
Ֆեյսբուքյան էջում հարցման մասնակիցների 66%-ը խոստովանել է նաև, որ գիրացել է տոների ժամանակ, իսկ 34%-ի քաշը մնացել է նույնը:
Նշենք, որ ամանորյա տոների ժամանակ քաշ հավաքելուն նպաստում են ոչ միայն քաոսային սնունդն ու ուտելիքների բարձր կալորիականությունը, այլ նաև ֆիզիկական ծանրաբեռնվածության բացակայությունը: Այդ օրերին մարզասրահները փակ են, և շատերն ալարում են դուրս գալ զբոսնելու:
Եթե դժվար եք վերադառնում նորմալ սննդակարգի տոների հետո, ապա հետևեք մասնագետների խորհուրդներին. սկսեք աստիճանաբար, նվազեցրեք կալորիականությունն ու օրական առնվազն 2 լ ջուր խմեք:
Ինչպես նաև լավ գաղափար է բեռնաթափման օրեր կազմակերպելը՝ շաբաթական մեկ անգամ: Կարելի է օրվա ընթացքում ուտել 6 ձու և 3 ցիտրուսային միրգ՝ նարինջ կամ թուրինջ: Կաթնաթթվային մթերքների սիրահարները կարող են բեռնաթափման օրերին նաև կեֆիր խմել. ամբողջ օրվա ընթացքում կարելի է խմել 1,5-2 լիտր ցածր յուղայնությամբ կեֆիր: Իսկ ահա միայն խնձոր ուտելը վատ ընտրություն է, քանի որ խնձորի մեջ շաքար և պարզ ածխաջրեր շատ են պարունակվում, իսկ դա նշանակում է, որ դրանց օգտագործումը բարձրացնում է արյան մեջ գլյուկոզայի մակարդակը, իսկ որոշ ժամանակ անց մարդն իրեն կրկին քաղցած և էներգիայից զրկված է զգում:
