Տպել
Ոստիկանության 6-րդ վարչությունում քննվող քրեական գործի շրջանակներում հարցաքննության են կանչել Երեւանի ավագանու «Լույս» խմբակցության ղեկավար Դավիթ Խաժակյանին եւ նրա վարորդին։ Ասում են՝ «Լույս» խմբակցության վարորդն աշխատանքի չի գնացել, սակայն համայնքային բյուջեից աշխատավարձ է ստացել, որը փոխանցել է ԼՀԿ առաջնորդ Էդմոն Մարուքյանի վարորդին, որը Խաժակյանի վարորդի ընկերն է։ Խոսքը մոտ 2.5 մլն դրամի չարաշահման մասին է։ Դարի «կոռուպցիոն սկանդալի» շուրջ զրուցեցինք Դավիթ Խաժակյանի հետ, ով վկայի կարգավիճակ ունի։
– Ի՞նչ քրեական գործի մասին է խոսքը, ինչո՞ւ են Ձեզ հրավիրել 6-րդ վարչություն։
– «Լույս» խմբակցությունն ունի օրենքով իրեն ամրակցված ծառայողական մեքենա եւ վարորդ, որը նախատեսված է քաղաքապետարանի հաստիքացուցակով։ Վարորդը քաղաքապետարանի աշխատակից է, այսինքն՝ իր գործատուն Երեւանի քաղաքապետարանն է։ 2 տարի նա կատարել է իր աշխատանքը, ըստ զանգերի՝ գնացել է անհրաժեշտ վայր՝ քաղաքապետարանի կանչով, իմ կանչով եկել է ինձ մոտ, խնդիր չի եղել, ստացել է իր աշխատավարձը, պրեմիաներ, եւ եկել հասել է այն օրը, երբ ոստիկանության 6-րդ վարչությունից իրեն տանում են ոստիկանություն եւ հարցաքննում այն մասին, որ նա, ըստ էության, քիչ է իր աշխատանքը կատարել եւ դրանով համայնքին վնաս է պատճառել։ Այն հարցին, որ եթե էդպես է, ինչու քաղաքապետարանը որեւէ միջոց չի ձեռնարկել, իրենք պատասխան չունեն։ Եվ վերցրել են գործի այն մասը, մի քանի լուսանկար, որտեղ ես վարում եմ մեքենան, ինչի իրավունքն ունեմ, եւ եզրակացրել են, որ նա իր աշխատանքը չի կատարել, անգամ չեն փորձել լսել քաղաքապետարանի աշխատակիցներին, որ աշխատել են իր հետ, եւ հարուցել են քրեական գործ։
– Իսկ ինչպե՞ս է ձեր խմբակցության վարորդի աշխատավարձը ստացել Էդմոն Մարուքյանի վարորդը։
– Ինձ դրա մասին հարցրել է նաեւ «Հայկական ժամանակի» լրագրողը՝ ներկայացնելով դա որպես իրենց տեղեկությունը, եւ ես ասացի, որ եթե այդ տեղեկությունը ճիշտ լիներ, կնշանակեր, որ իրենք հրապարակում են նախաքննական գաղտնիք։ Թե ինքն ինչպես է տնօրինել իր աշխատավարձը, ես չեմ կարող իմանալ, որովհետեւ նա աշխատող է, ով վաստակում է իր գումարը, իր աշխատանքը կատարում է, թե այդ գումարն ինքն ինչպես է տնօրինում, դա բացառապես իր գործն է։ Միայն գիտեմ, որ Մարուքյանի վարորդ Համլետ Զարոյանի հետ նրանք ընկերներ են եւ իրար մեջ կարող են ունենալ ցանկացած պարտք ու պահանջի, ֆինանսական գործեր։ Դրանք իրենց անձնական խնդիրներն են, որոնք ես ո՛չ գիտեմ, ո՛չ էլ ուզում եմ իմանալ, որովհետեւ ինձ հետաքրքիր է, որ նա իր աշխատանքը պատշաճ կատարի, իսկ նա դա անում է։
– Իսկ իրավապահները որտեղի՞ց են իմացել, որ այդ գումարները փոխանցել են իրար։
– Մեկ տարի շարունակ գաղտնալսել են ե՛ւ ինձ, ե՛ւ իմ վարորդին, ե՛ւ Մարուքյանի վարորդին, լուսանկարել են ինձ տարբեր տեղերում, նաեւ ապօրինաբար ստացել են ինչ-որ տեղեկություններ, որոնք չեն կարող ճշմարիտ լինել, որովհետեւ ապօրինի ստացված են, այդ թվում՝ մեր հեռախոսային զրույցները, եւ դրա հիման վրա փորձել են ինչ-որ ցուցմունք կորզել։ Բայց էությունն այն է, որ եթե նա պատշաճ իր աշխատանքը կատարել է, ապա ինչպես կուզեր, կտնօրիներ իր աշխատավարձը, որովհետեւ դա այլեւս իր գույքն է։
– Իսկ ավելի անկեղծ՝ կա՞ այստեղ չարաշահում, մախինացիա Ձեր կամ վարորդի կողմից։
– Ես սպասում եմ այն օրվան, երբ այս գործի նախաքննությունը կավարտվի եւ կգնա դատարան, որտեղ ամբողջ ծավալով գործը կքննվի, եւ ես հավաստիացնում եմ՝ որեւէ իրավաբան, ով իրեն մասնագիտական առումով հարգում է, չի կարող այստեղ որեւէ ապօրինություն տեսնել։
– Դուք ունե՞ք ապացույց, որ նա պատշաճ կատարել է իր աշխատանքը։
– Իհարկե, ունեմ։ Նա պարբերաբար այցելել է Երեւանի համայնքապատկան «Երեւան տրանս» ՓԲԸ, ցուցմունք կարող են տալ մեքենայի վրա աշխատանք կատարող անձինք, որոնք, օրինակ, վնասված մեքենան սարքել են, այդ բոլոր գործառույթներն իրականացրել է վարորդը։
– Գուցե միայն տեխսպասարկման կետ տանելո՞ւ գործառույթն է իրականացրել, բայց վարել եք Դուք։
– Մեծ մասամբ ես եմ վարել մեքենան՝ այնպես, ինչպես մեծ մասամբ վարում է Հայկ Մարությանը՝ իրեն ամրակցված մեքենան։ Ես նպատակահարմար եմ գտել իրեն աշխատանքի հանձնարարություններ տալ այնքանով, որքանով որ դա ինձ անհրաժեշտ է եղել, իսկ եթե քաղաքապետարանն ավելիի ցանկություն է ունեցել, կարող էր հրավիրել եւ այդ հանձնարարությունը տալ։ Ես պարտավորություն չունեմ յուրաքանչյուր իմ փոխադրման ժամանակ, հատկապես ոչ աշխատանքային ժամերին, իրեն հրավիրել եւ որեւէ խնդիր չեմ տեսնում, որ ամեն օր չէ, որ վարորդին հրավիրել եմ։
– Իսկ ոչ աշխատանքային ժամերին ծառայողական մեքենան վարելու իրավունք ունե՞ք։
– Այո, ունեմ, որովհետեւ այն ամրակցված է Երեւան քաղաքի տեղական ինքնակառավարման մասին օրենքով, եւ Երեւանի քաղաքապետարանում կա մեկ կատեգորիայի մեքենա, որը տրվում է ֆրակցիային օրենքով․ դա այդ մեքենան է։ Նույնիսկ քաղաքապետի մեքենան տրվում է քաղաքապետի որոշումով, իսկ սա ունի օրենքով տրված մակարդակ։ Իսկ քանի որ իմ աշխատանքը չնորմավորված է, ես, բնականաբար, այն շահագործում եմ ե՛ւ աշխատանքային ժամերից, ե՛ւ աշխատանքային օրերից դուրս։ Ինչպես ինձ որեւէ մեկը չի ասում՝ ինչու ես շաբաթ օրով աշխատում, գնում բնակիչների հետ հանդիպման, նույնպես չպիտի հնչի՝ ինչու եմ այդ մեքենան շահագործում աշխատանքային ժամերից դուրս։
– Այսինքն՝ նաեւ անձնակա՞ն նպատակներով եք շահագործում այդ մեքենան։
– Ես չեմ բացառում, որ, ասենք, ինչ-որ տեղ գնալիս նաեւ այդ ընթացքում անձնական գործեր կատարած լինեմ, որովհետեւ այդ մեքենան տրված է, որպեսզի շահագործվի։ Դուք պատկերացրեք, եթե ես մեքենան տանեմ, քաղաքապետարանում կանգնեցնեմ, հետո մեկ այլ մեքենայով գնամ քաղաքապետարան, էնտեղից այն վերցնեմ, գնամ բնակչի հետ հանդիպման, հետո բերեմ-թողնեմ քաղաքապետարանում ու գնամ այլ գործերով։ Այդպես չի կարող լինել այն պարզ պատճառով, որ ես վարձու աշխատող չեմ, աշխատավարձ չեմ ստանում Երեւանի քաղաքապետարանից՝ որպես ավագանու անդամ, եւ, հետեւաբար, դա նաեւ էսպես գործունեությանս խթանող միջոց է, որը ես օգտագործում եմ։
