Տպել
Ֆրանսիացի լուսանկարիչ Ռենե Ռոբերը ցրտահարվել է ու մահացել փարիզյան մարդաշատ փողոցում։ Նրա ընկերները վստահ են, որ պատճառը մարդկանց անտարբերությունն է, որոնք անցել են ընկած ծերունու կողքով, հայտնում է «RTL» ռադիոկայանը՝ վկայակոչելով հանգուցյալի ընկերոջ՝ լրագրող եւ երաժիշտ Միշել Մոմպոնտեի խոսքերը։ ՝
Նրա խոսքով՝ 84-ամյա Ռոբերը ցրտահարությունից մահացել է ձյան մեջ վեց ժամ մնալուց հետո։ Նա մոտավորապես 21:30-ին դուրս է եկել տնից, իրեն վատ զգացել ու ընկել։ Մինչեւ առավոտյան ժամը վեցը ոչ ոք ուշադրություն չի դարձրել տղամարդու վրա, մինչ նրա կողքով անցնող անօթեւանն օգնություն է կանչել։
«Եթե տեսնում ենք, որ ինչ-որ մեկն անգիտակից ընկած է, փորձեք կանգ առնել եւ նայել՝ արդյոք նա շնչում է, որովհետեւ այդ մի քանի վայրկյանը կարող է կյանք փրկել»,- ասել է Մոմպոնտեն։ Նա հավելել է, որ Ռոբերի ինքնազգացողությունը վատացել է Փարիզի մարդաշատ շրջաններից մեկում, սակայն ոչ ոք չի օգնել նրան։
