Տպել
Հայաստանյան շուկան երկար ժամանակ սպասում էր ավտոմեքենաների «Թրեյդ–ին» համակարգին առնչվող օրենսդրական նախագծի ընդունմանը։ Միջազգային փորձը ցույց է տալիս, որ նշված համակարգը հաջողությամբ գործարկվում է արտասահմանյան շատ երկրներում և նրա ներդրումը Հայաստանում կնպաստի նաև ավտոպարկի թարմացմանը։ Sputnik Արմենիայի հետ զրույցում այս մասին ասաց «Մուրան» ընկերության գլխավոր տնօրեն Արսեն Զախարյանը։
Ըստ մեր զրուցակցի` ոլորտի ներկայացուցիչները տևական ժամանակ աշխատել են պետական մարմինների հետ։ Զախարյանը վստահեցնում է, որ մեր շուկան այդ առումով բավականին մեծ պոտենցիալ ունի։ Նրա տեղեկացմամբ` ԵԱՏՄ մաքսային միությանն անդամագրվելու առթիվ տեղի ունեցավ փոփոխություն օգտագործված մեքենաների ներկրման հարցում, ինչի արդյունքում հին մեքենաների ներկրումը բավականին թանկացել է։ Այդ իսկ պատճառով որոշակի նախադրյալներ կան ավտոմեքենաների առաջնային շուկայի զարգացման համար։
Այնուամենայնիվ, կան նաև որոշակի թերություններ` կապված նոր համակարգի գործարկման հետ։ «Թրեյդ–ին» սխեմայով գործունեություն իրականացնելու համար պետք է համապատասխան լիցենզիա, որի արժեքը 1 միլիոն դրամ է։ Առաջին տարվա համար այն, որպես պիլոտային ծրագիր, տրամադրվել է 50 տոկոս զեղչով, իսկ 2023 թվականից վճարման լիցենզիայի արժեքը տարեկան կազմելու է 2 միլիոն դրամ։
«Գինը մատչելի չէ, քանի որ «Թրեյդ–ին» համակարգի շուկան այդքան մեծ ծավալներ չունի։ Մեր ընկերությունը փորձելու է իր ծրագրերին միացնել նաև բանկերին, այսիքն` դիտարկել այն տարբերակը, որ «Թրեյդ–ին» համակարգի մեքենաները լինեն որպես կանխավճար, որպեսզի բանկերը ֆինանսավորեն մնացորդային տարբերությունը»,– ասաց «Մուրան» ընկերության գլխավոր տնօրենը։
Զախարյանի կարծիքով` «Թրեյդ–ին» լիցենզիայի 1 միլիոն, իսկ հետո 2 միլիոն դրամ արժեքն անտրամաբանական է, որովհետև պաշտոնական ավտոներմուծողները չեն հասկանում, թե ինչից է ձևավորվում այդ գումարը։
«Մուրան» ընկերության հաշվարկներով` նշված համակարգով տարեկան իրականացվում է 20-25 մեքենայի գործարք, հետևաբար լիցենզիայի համար 2 միլիոն դրամ վճարելու դեպքում յուրաքանչյուր մեքենայի դեպքում լինելու է մոտ 100 հազար դրամի հավելյալ ինքնարժեք, այսինքն ընկերությունը փաստացի շահույթ չի ունենալու։ «Թրեյդ–ին» համակարգն այս պահին չի դիտարկվում որպես շահույթ հետապնդող. այն հնարավորություն է` ակտիվացնելու հայաստանյան շուկան։
«Մուրան» ընկերությունը, լինելով Հայաստանում մի քանի բրենդների ներկայացուցիչ, ընտրել է այն տարբերակը, ըստ որի` «Թրեյդ–ին» համակարգով վերցվող մեքենան կարժենա առավելագույնը նոր մեքենայի գնի ոչ ավել, քան 50 տոկոսը։ Գնահատումը տեղի է ունենալու շուկայական արժեքի սահմաններում, երբ ուսումնասիրվեն մեքենայի տեխնիկական և այլ վիճակները։
Ամբողջությամբ՝ armeniasputnik.am
