Տպել
Ճիշտ նախաճաշն օրվա լավ սկզբի կարևորագույն գործոնն է, քանի որ ապահովում է ակտիվ օրվա համար անհրաժեշտ էներգիայով ու օրգանիզմի կենսագործունության համար անհրաժեշտ սննդարար նյութերով, ուստի սննդամթերքի ընտրությանը հարկավոր է լրջորեն մոտենալ։ Մասնագետները սովորաբար խորհուրդ են տալիս չմոռանալ նախաճաշի մասին, քանի որ այն շատ կարևոր է ամբողջ օրգանիզմի համար, սակայն միևնույն ժամանակ հարկ է հիշել, որ սննդամթերքի ոչ բոլոր տեսակներն է կարելի ուտել նախաճաշին։
Գոյություն ունեն սննդամթերքի տեսակներ, որոնք նախաճաշին ուտելը կարող է հանգեցնել օրգանիզմում բորբոքային գործընթացների զարգացման` դրանով իսկ բարձրացնելով տարբեր ախտաբանությունների հավանականությունը։ Սննդամթերքի նման տեսակների շարքին են դասվում.
Արագ պատրաստվող շիլաները
Շիլաները բավական տարածված մթերք են նախաճաշի համար, սակայն սննդաբանները հորդորում են ուշադիր լինել դրանց ընտրության հարցում ու խուսափել արագ պատրաստման համար նախատեսված շիլաներից։ Բանն այն է, որ շիլայի օգտակարությունը կախված է նրանից՝ պատրաստված է արդյոք այն ամբողջահատիկ մթերքից, քանի որ միայն նման շիլաներն են տալիս օրգանիզմին անհրաժեշտ մանրաթելերը։ Սակայն արագ պատրաստման համար նախատեսված շիլաները միայն բարձրացնում են օրգանիզմի ածխաջրային ծանրաբեռնվածությունը, ինչը բացասաբար է անդրադառնում ենթաստամոքսային գեղձի վրա և նպաստում է օրգանիզմում շաքարի մակարդակի բարձրացմանը, ինչն էլ հանգեցնում է բորբոքումների զարգացման։
Հնդկահավի միս պարունակող մթերքը
Հնդկահավի միսն ունի ցածր յուղայնություն և սպիտակուցների հիանալի աղբյուր է, սակայն դրանով պատրաստված սննդամթերքի ոչ բոլոր տեսակներն են օգտակար։ Մասնագետների խոսքով՝ հնկահավի վերամշակված մսով պատրաստված մսամթերքը (երշիկեղեն, ապուխտներ և այլն), ինչպես և ցանկացած այլ վերամշակված միս, կարող է խիստ վտանգավոր լինել, քանի որ պարունակում է մեծ քանակությամբ ճարպեր ու կալորիաներ, որոնք էլ բարձրացնում են բորբոքումների զարգացման հավանականությունը։
Թխուկները
Շատերի մոտ նախաճաշը մտազուգորդվում է սուրճի և տարատեսակ թխուկներկ հետ, մինչդեռ նման նախաճաշը հարուստ է կալորիաներով, ռաֆինացված շաքարով ու տրանսճարպերով` բորբոքմանը նպաստող բոլոր բաղադրիչներով։ Ժամանակ առ ժամանակ նման մթերք օգտագործելը չի վնասի օրգանիզմին, սակայն դրանց կանոնավոր գործածությունը կարող է շատ վտանգավոր լինել։
Հավելումներով սուրճը
Սուրճը նախաճաին կիրառվող ամենատարածված ըմպելիքներից մեկն է, սակայն այն օգտակար կարող է համարվել միայն առանց որևէ հավելման, այդ թվում նաև առանց շաքարի ու սերուցքի օգտագործելու դեպքում։ Մասնագետները հիշեցնում են, որ հեղուկի մեջ շաքարն ավելի արագ է յուրացվում ու կտրուկ բարձրացնում է գլյուկոզայի մակարդակը, ինչն էլ հանգեցնում է բորբոքումների զարգացման։
Նյութի աղբյուրը` medikforum.ru
