Տպել
Սովորական ջուրը կարող է օգնել կարգավորել զարկերակային ճնշումը, հավաստիացնում է սննդաբան, նուտրիցիոլոգ Եվգենի Արզամասցեւը (Ռուսաստան)։
Նրա խոսքով՝ ջրի անհամաչափ օգտագործման ռեժիմը նպաստում է զարկերակային ճնշման խնդիրների՝ դրա անկայունության, կտրուկ տատանումների առաջացմանը։
«Երբ մարդը քիչ ջուր է խմում կամ խմում է երբեմն-երբեմն, կարող են ճնշման տատանումներ առաջանալ։ Մի օր ճնշման ցուցանիշները կարող են նորմալ լինել, հաջորդ օրը՝ ոչ նորմալ»,- ասել է մասնագետը։
Այդ փոփոխությունները, ըստ Արզամասցեւի, բացատրվում են նրանով, թե ինչպես է օրգանիզմը վերաբաշխում հեղուկը բջիջների ներսում եւ բջջամերձ տարածքում։ Հեղուկը կարող է անբավարար կամ, հակառակը, չափից ավելի շատ լինել։
Մասնագետի խոսքով՝ ճնշման կարգավորմանն օգնում է ջրի համաչափ օգտագործումը՝ օրվա ընթացքում ոչ մեծ բաժիններով։ Դրա ընդհանուր ծավալը կարող է կազմել մեկուկես-երկու լիտր։ Սննդաբանի կարծիքով՝ այս սկզբունքով ջուր խմելը կարգավորում է այն հորմոնների աշխատանքը, որոնք պատասխանատու են մարմնի բջիջներում հեղուկի բաշխման համար, ինչն, իր հերթին, կբարելավի զարկերակային ճնշման ցուցանիշները։
Զարկերակային ճնշման կարգավորման արդյունավետ եւ հասանելի այլ միջոցներից մասնագետը նշել է օգտագործվող աղի քանակության կրճատումը եւ կալիումով եւ մագնիումով հարուստ մթերքների ներառումը կերակրացանկում։
