Տպել
Dior ֆրանսիական նորաձևության տունն իր 70-ամյակի առթիվ թողարկել է մինի-սերիալ, որը նվիրված է բրենդի պատմությանն ու նրա զարգացմանը: Այդ մասին հայտնել է Harper՚s Bazaar-ը:
Նախագիծն ստացել է Inside Dior անվանումը: Առաջին սերիայի պրեմիերան նշանակված է փետրվարի 9-ին՝ Նյու Յորքում Նորաձևության շաբաթի մեկնարկի օրը:
Առաջին հերթին հանրությանը կցուցադրեն երկու սերիաները: Առաջինում կներկայացվի նորաձևության տան պատմությունը և հոբելյանին նախապատրաստվելը: Իսկ երկրորդը նվիրված է բրենդի նոր կրեատիվ տնօրենի՝ Մարիա Գրացիա Կյուրիի ստեղծագործությանը և այն բանին, թե ինչպես էր նա պատրաստվում իր դեբյուտային հավաքածուի ցուցադրությանը:
Christian Dior ֆրանսիական նորաձևության տունը հիմնադրվել է 1946 թվականին մոդելագործ Քրիստիան Դիորի կողմից: Ժամանակի հետ այդ բրենդի ներքո սկսել է թողարկվել ոչ միայն կանանց ու տղամարդկանց համար նախատեսված հագուստ, կոշիկ և պարֆյումերիա, այլև դեկորատիվ կոսմետիկա, ինչպես նաև մաշկի խնամքի միջոցներ, ժամացույցներ, ոսկերչական իրեր:
Dior-ը բազմաթիվ հայտնի դերասանների է ներգրավել իր գովազդային արշավներին: Օրինակ, Dior Homme Sport գովազդի համար հրավիրել են Ջուդ Լոուին, իսկ Sauvage բույրը ներկայացրել է Ջոնի Դեփը:
