Տպել
Loro Piana-յի Summer Walk-ը խորհրդանիշն է այն բանի, թե ինչպես է ապրում հասարակության սերուցքը հետհամաճարակային ֆինանսական ճգնաժամի ժամանակ՝ հարմարավետությամբ եւ շքեղությամբ, բայց միեւնույն ժամանակ զսպվածության պահպանմամբ, գրում է EL Pais-ը։
Վերջերս Summer Walk լոֆերները դարձել են Ուոլ Սթրիթի գայլերի եւ Սիլիկոնային հովտի մագնատների սիրելին: Իտալիայում ձեռքով պատրաստված թավշե (պատրաստում են նաեւ կաշվից եւ քաշմիրից) եւ տարբերվող սպիտակ ռետինե ներբանով, աներեւակայելի հարմարավետ ու թեթեւ: Ինչպես նաեւ շատ թանկ: Շքեղ ապրանքներ արտադրող Բեռնար Առնոյի որդին՝ Ժան Առնոն, դրանցից կրում է շագանակագույնը, մինչդեռ պատկերասրահագետ Լարի Գագոսյանը նախընտրում է ալիգատորի կաշվից լոֆերներ (որոնք արժեն ավելի քան 4000 դոլար):
Տեսախաղերի մագնատ Բոբբի Կոտիկը դրանք համադրում է իտալական նորաձեւության տան սվիտերների հետ, մինչդեռ հույն ժառանգորդ Ստավրոս Նիարխոսը դրանք կրում է կապույտ ջինսերով Պորտոֆինոյում եւ Միկոնոսում հանգստանալու ժամանակ: Դեւիդ Բեքհեմը եւս ապրանքանիշի երկրպագու է:
Նորաձեւության աշխարհում Summer Walk ֆենոմենը նման է ասպիրինի, որը բուժում է հարբածությունը, որն առաջացել է էկզոտիկ շքեղ սպորտային կոշիկների պատճառով, որոնք գրավել են շուկան վերջին տարիներին:
Այս լոֆերների ժողովրդականության ծագման վերաբերյալ տարբեր տեսություններ կան: Նորաձեւության որոշ փորձագետներ իրենց հաջողությունը վերագրում են «Ժառանգները» սերիալի դերասան Ջերեմի Սթրոնգին, ով մարմնավորել է Քենդալ Ռոյին։ Նա դրանք կրում է երրորդ եթերաշրջանում: Մյուսները պնդում են, որ Summer Walk-ի հանրաճանաչությունը եւս մեկ նշան է գերհարմարավետ կոշիկներ կրելու համաճարակի տենդենցի գլամուրացման մասին: Դա կարելի է բացատրել նաեւ հարուստների մշտական կարիքով գեղեցիկ, թանկարժեք ու շքեղ, բայց զուսպ իրերի հանդեպ։ Ոճ, որն ասում է. «Ինձ չի հետաքրքրում, թե ինչ եմ հագնում, թեեւ ինձ իսկապես հետաքրքրում է»:
Loro Piana-ն իր մոկասինները նկարագրում է որպես «կատարյալ կոշիկ ամառային նավարկության կամ լողափի համար»:
