Տպել
Այս պահին մարդկային աշխատուժը արհեստական բանականության (ԱԲ) վրա հիմնված տեխնոլոգիաներով փոխարինելու ծախսարդյունավետ միջոցներ չկան։ Նման եզրակացությանն են հանգել Մասաչուսեթսի տեխնոլոգիական ինստիտուտի փորձագետները՝ անցկացնելով հետազոտություն, որի նպատակն է եղել փարատել մտավախությունը, որ ԱԲ-ը շուտով մարդկանց կփոխարինի մի շարք ոլորտներում։
Մարդկային աշխատուժը ԱԲ-ով փոխարինելու կենսունակության վերաբերյալ առաջին խորը ուսումնասիրությունը մոդելավորել է ԱՄՆ-ում տարբեր ոլորտներում տարբեր առաջադրանքների ավտոմատացման տնտեսական գրավչությունը: Ուշադրության կենտրոնում են եղել այն աշխատատեղերը, որտեղ համակարգչային տեսողության տեխնոլոգիան անհրաժեշտ կլինի մարդուն փոխարինելու համար, օրինակ՝ ուսուցչին կամ անշարժ գույքի գնահատողին: Արդյունքում պարզվել է, որ խնդրո առարկա մասնագիտությունների միայն 23%-ը կարող է արդյունավետորեն փոխարինվել ԱԲ-ով, եթե համեմատվեն նրանց աշխատավարձերը և արտադրական գործընթացում համապատասխան տեխնոլոգիաների ներդրման արժեքը։ Այլ դեպքերում տնտեսապես ավելի շահավետ է օգտագործել մարդկանց, քանի որ վիզուալ ճանաչման համակարգերի ինտեգրումն ու շահագործումը թանկ արժեն:
Անցած տարվա ընթացքում արագացել է ԱԲ տեխնոլոգիաների ներդրումն արդյունաբերության տարբեր ոլորտներում, ինչին նպաստել է OpenAI ընկերության ChatGPT-ի և գեներատիվ այլ ալգորիթմների ի հայտ գալը, որոնք ցույց են տվել նեյրոցանցերի ներուժը: Տեխնոլոգիական ընկերությունները՝ ԱՄՆ-ում Microsoft-ից և Alphabet-ից մինչև Չինաստանում Baidu և Alibaba, գործարկել են ԱԲ-ով աշխատող նոր ծառայություններ և հայտարարել այս ոլորտում զարգացումն արագացնելու ծրագրերի մասին: Այս ամենը մտավախություն է առաջացրել, որ նեյրոցանցերի համատարած ներդրման պատճառով հսկայական թվով մարդիկ կզրկվեն աշխատանքից։
Մասաչուսեթսի տեխնոլոգիական ինստիտուտի հետազոտողների զեկույցում նշվում է, որ նման մտահոգություններ առաջացել են լեզվական մեծ մոդելների ի հայտ գալուց հետո։ Այնուամենայնիվ, ներկայումս մարդկանց մեկ քառորդից քիչ մասը կարող է փոխարինվել համակարգչային տեսողության համակարգերով, քանի որ մյուս դեպքերում դա տնտեսապես շահավետ չէ:
Հիշեցնենք, որ համակարգչային տեսողությունը մեքենաներին հնարավորություն է տալիս բովանդակալից տեղեկություն ստանալ թվային պատկերներից և տեսողական այլ տվյալներից: Այն օգտագործվում է տարբեր ոլորտներում՝ ավտոմեքենաների ինքնակառավարումը, սմարթֆոնների լուսանկարների դասակարգում և այլն: Նաև պարզվել է, որ համակարգչային տեսողության համակարգերի ներդրման ծախսերի և օգուտների հարաբերակցությունը ամենաօպտիմալն է այնպիսի ոլորտներում, ինչպիսիք են մանրածախ առևտուրը, տրանսպորտը և պահեստավորումը: Նման համակարգերի օգտագործումը կարող է արդիական լինել նաև առողջապահության ոլորտում:
Ըստ հետազոտողների՝ ներկայումս 800 մասնագիտություններում դիտարկվող 1000 առաջադրանքներից միայն 3%-ը կարող է ավտոմատացվել համակարգչային տեսողությամբ ԱԲ համակարգերի ներդրման միջոցով։ Այնուամենայնիվ, մինչև 2030-ը այս ցուցանիշը կարող է աճել մինչև 40%, եթե տվյալների օգտագործման արժեքը նվազի, և ԱԲ համակարգերն ավելի ճշգրիտ դառնան:
