Տպել
Նախքան ջերմամշակումը միսը լվանալը վատ միտք է, և Հյուսիսային Կարոլինայի համալսարանի (ԱՄՆ) գիտնականները կոչ են անում հրաժարվել այդ վտանգավոր սովորությունից։
Բանն այն է, որ միսը լվանալու սովորությունը, մասնագետների խոսքով, կարող է մեծացնել թունավորվելու ռիսկը։ Շատ հաճախ հում միսը վարակված է վտանգավոր բակտերիաներով, ինչպիսին են Salmonella-ն, Campylobacter-ն ու Clostridium perfringens-ը։ Երբ մենք մսի կտորը պահում ենք հոսող ջրի տակ, ջրի կաթիլների հետ միասին բակտերիաները տարածվում են ամբողջ խոհանոցում, հայտնվում են ամենամոտ գտնվող իրերի մակերեսին և մթերքի վրա։ Հաճախ անգամ շատ մանրակրկիտ մաքրությունը չի կարող վերացնել այդ բակտերիաները։
Գիտափորձի շրջանակում գիտնականները հրավիրել էին 300 կամավորների, որոնք պետք է պատրաստեին ուտեստներ հավի մսից ու աղցան։ Մասնակիցները բաժանվել էին երկու խմբի․ առաջին խումբը լվացել էր միսը, իսկ երկրորդը՝ ոչ։ Անհրաժեշտ էր նաև կտրատել միսն առանձին տախտակի վրա և շատ լավ լվանալ ձեռքերն ուտեստները պատրաստելուց հետո։ Երկու խմբերի մասնակիցներին տրված միսը պարունակում էր E.coli բակտերիաներ։
Հում միսը լվացած մասնակիցների 26 տոկոսի դեպքում բակտերիաները հետագայում հայտնաբերվել էին նաև աղցանի մեջ։
Փորձագետները կազմել են գործողությունների ցանկը, թե ինչպես է անհրաժեշտ վարվել հում մսի հետ, որպեսզի հնարավոր լինի խուսափել այլ մթերքների աղտոտումից։
- Խորհուրդ է տրվում պատրաստել միսը մնացած բոլոր ուտեստները պատրաստելուց հետո։
- Արգելվում է լվանալ հում միսը և նախքան մսի հետ կոնտակտից հետո որևէ բանին դիպչելը անհրաժեշտ է օճառով լվանալ ձեռքերը հոսող ջրի տակ առնվազն 20 վայրկյան շարունակ։
- Թռչնամիս պատրաստելիս այն անհրաժեշտ է տաքացնել մինչև առնվազն 73 աստիճանն ըստ Ցելսիուսի․ միայն այդ ժամանակ կոչնչանան վտանգավոր բակտերիաները։
