Ռուբեն Վարդանյան. «Մենք կարող ենք ոչ միայն լավը լինել մեզ համար, այլև որևէ լավ բան անել աշխարհի համար»

«Հայաստանի զարգացման նախաձեռնություններ» (IDeA) հիմնադրամի համահիմնադիրներ Ռուբեն Վարդանյանն ու Վերոնիկա Զոնաբենդը 2018թ. մարտի 20-ին հանդիպել են Հայաստանի Ամերիկյան համալսարանի դասախոսական կազմի և  ուսանողների հետ։ Հանդիպման ժամանակ Ռուբեն Վարդանյանը առաջին անգամ ներկայացրել է IdeA-ի ապագա նոր կարգախոսը՝ «Մտածիր և կապիր, մտածիր և ստեղծիր, մտածիր և գործիր» (Think to connect, think to create, think to act): «Աշխարհը դառնում է փոխկապակցված և մենք ապրում ենք յուրահատուկ ժամանակներում: Մտածիր և կապիր (think to connect). սա խելացի, կրթված մարդկանց նույն արժեքի շուրջ համախմբելու լավագույն ուղին է»,- ասել է Ռուբեն Վարդանյանը:

Եռանկյունու կարևոր կողմերը

Կրթությունը, կայուն զարգացումը և միգրացիան եռանկյունու կողմերն են, որոնք ի մի բերելը և զարգացնելն ավելի ու ավելի կարևոր է դառնում: Սա երկրի հաջողության կամ անհաջողության կարևոր տարր է: Կան միգրացիայի տարբեր տեսակներ և դրանք շատ մեծ ազդեցություն են թողնում տնտեսական աճի վրա: Ես հավատում եմ, որ աշխարհի ապագայի կարևոր շարժիչը կրթությունն է:

Կրթության առաջ կանգնած մարտահրավերները

Այսօրվա ամենակարևոր ճգնաժամն այն է, որ շատ երկրներում ուսուցիչները պատշաճ հարգանքի չեն արժանանում հասարակության կողմից: Լավ օրինակ է Ֆինլանդիան, որի բանաձևը շատ պարզ է՝ 10 լավագույն ուսանողներից 7-ն ուզում է ուսուցիչ դառնալ: Ամերիկայում, օրինակ, 10 լավագույն աշակերտից միայն 2-ն ունեն այդ ցանկությունը, Ռուսաստանում՝  միայն 1-ը 30-ից:

Կեղծ իրականությունն ու փողի անկարևորությունը

Կեղծ նորությունները նոր իրականության մի մասն են: Այսօր իրականությունների միջև տարբերություններն անկառավարելի են դարձել: Ոչ ոք չի կարող տարբերակել: Մենք ապրում ենք մի աշխարհում, որտեղ փողը գնալով քիչ կարևոր է դառնում, և առաջնային է դառնում տաղանդավոր մարդը:

Լեզուների իմացության կարևորությունը

Ես ուզում եմ հարցնել՝ քանի՞ մարդ կա այստեղ, որ գիտի չորս և ավելի լեզու: Ձեզանից քանի՞սն է խոսում պարսկերեն: Ինչո՞ւ եք կարծում, որ պարսկերենը կարևոր չէ, ինչու եք միայն հայերենի, անգլերենի և ռուսերենի մասին մտածում:

Մեծ երազանքը

Մեծ երազանք ունենալու համար հարկավոր է շատ քաջ լինել, քանի որ երազանքը ենթադրում է նաև ձախողումներին պատրաստ լինել: Մենք «իդեալական փոթորիկի» իրավիճակում ենք, այնքան բաներ են փոխվում քաղաքական, սոցիալական, մարդկային արժեքների տիրույթում: Մենք կարող ենք ոչ միայն լավը լինել մեզ համար, այլև որևէ լավ բան անել աշխարհի համար: Իմ մեծ երազանքն է՝ նպաստել, որպեսզի աշխարհն ավելի լավն ու ավելի ապահով դառնա:

Մարի Թարյան

Լուսանկարը՝ «Մեդիամաքս»-ի

Ամբողջությամբ՝ mediamax.am