Տպել
Առողջությունը կախված է ոչ միայն ժառանգականությունից և կենսակերպից, այլև սննդային սովորություններից: Նույնիսկ ամենափոքր փոփոխությունները կարող են ապագայում լուրջ արդյունքներ ապահովել: Goodhouse.ru-ն ներկայացրել է մի քանի պարզ սովորություն, որոնք դրական ազդեցություն կունենան առողջության վրա:
Օմեգա-3 ճարպաթթուներով հարուստ մթերք: Սննդաբանների մի մասն օմեգա-3 ճարպաթթուները համարում է երիտասարդության ճարպեր: Այս ճարպաթթուներն օգնում են նվազեցնել արյան մեջ «վատ» խոլեստերինի մակարդակը, պայքարել բորբոքման դեմ, նվազեցնել սրտանոթային համակարգի հիվանդությունների զարգացման հավանականությունը: Բացի այդ՝ օմեգա-3 ճարպաթթուները նպաստում են ուղեղի աշխատանքին:
Շատ բջջանյութ օգտագործեք: Մրգերն ու լոբազգիները, որոնք մեծ քանակով բջջանյութ և սննդային մանրաթելեր են պարունակում, օգտակար են ոչ միայն մարդկանց, ովքեր հետևում են իրենց քաշին: «American Journal of Clinical Nutrition»-ում հրապարակված հետազոտության համաձայն՝ բջջանյութի յուրաքանչյուր 10 գրամը 17 տոկոսով նվազեցնում է սրտի իշեմիկ հիվանդությունից մահացության հավանականությունը: Բացի այդ՝ բջջանյութն օգնում է կարգավորել արյան մեջ շաքարի մակարդակը, նպաստում սրտի առողջությանը:
Գունավոր մրգեր և բանջարեղեն: Եթե ցանկանում եք առողջ սնվել, ընտրեք գունավոր մրգեր ու բանջարեղեն: Հակաօքսիդանտներն օգնում են հյուսվածքները պաշտպանել վնասումից, պայքարում են ծերացման դեմ:
Մի հրաժարվեք ձիթապտղի յուղից: Ձիթապտղի յուղը հակաօքսիդանտներ է պարունակում: Դրա պարբերական օգտագործումը կարող է 41 տոկոսով նվազեցնել կաթվածի զարգացման հավանականությունը: Միայն թե հիշեք, որ այն ջերմային մշակման ենթարկելու դեպքում կորցնում է իր հատկությունները:
Նվազեցրեք բրնձի օգտագործումը: Խոսքը սպիտակ բրնձի մասին է: Բրնձի այն տեսակաները, որոնք մշակման չեն ենթարկվում, բջջանյութ, ինչպես նաև մագնիում են պարունակում: Դրանք կարող են օգնել նվազեցնել երկրորդ տիպի շաքարային դիաբետի զարգացման հավանականությունը: Իսկ սպիտակ բրինձը պարզապես դատարկ կալորիաներ է պարունակում:
Մի հրաժարվեք սպիտակուցից: Սպիտակուցները կարևոր նյութեր են, որոնց օգնությամբ օրգանիզմն ամեն օր «վերանորոգում» է վնասված հյուսվածքները: Կենդանական և բուսական ծագման սպիտակուցները պետք է սննդակարգում ներառված լինեն ամեն օր: Որքան տարիքը մեծանում է, այնքան կարևոր է դառնում սպիտակուցների օգտագործումը:
Ջուր խմեք: Հեղուկի բավարար մակարդակն անհրաժեշտ է աղիների, անոթների աշխատանքի համար, օգնում է կարգավորել նյութափոխանակությունը:
Նյութը հրապարակման պատրաստեց 168.am-ը
