Տպել
Մեզանից շատերը հավանաբար լսել են երաժշտաթերապիայի եւ արտ-թերապիայի մասին, իսկ ի՞նչ կասեք «ճամփորդական թերապիայի» մասին:
Էդիթ Քոուենի համալսարանի նոր հոդվածում առաջարկվում է փոխել վերաբերմունքը զբոսաշրջության հանդեպ՝ այն դիտելով ոչ միայն որպես հանգստի գործունեություն, այլեւ որպես արդյունաբերություն, որը կարող է իրական օգուտներ բերել առողջությանը, գրում է Science-ը:
Ճշգրիտ առողջության կենտրոնի եւ Բիզնեսի եւ իրավունքի դպրոցի միջեւ համագործակցությունը ցույց է տվել, որ հանգստի ճանապարհորդության շատ ասպեկտներ կարող են դրական ազդեցություն ունենալ հոգեկան խանգարումներ կամ հիվանդություններ ունեցող մարդկանց վրա:
Աշխատանքի առաջատար հետազոտող դոկտոր Ջուն Վենն ասում է, որ զբոսաշրջության, հանրային առողջության եւ մարքեթինգի մասնագետների թիմն ուսումնասիրում է, թե ինչպես զբոսաշրջությունը կարող է օգտակար լինել դեմենցիայով մարդկանց:
«Բժշկական փորձագետները կարող են խորհուրդ տալ դեմենցիայի բուժման այնպիսի մեթոդներ, ինչպիսիք են երաժշտական թերապիան, ֆիզիկական վարժությունները, ճանաչողական խթանումը, հիշողության թերապիան, սենսորային խթանումը եւ հարմարեցումը պացիենտի սննդակարգին եւ շրջակա միջավայրին»,- ասել է բժիշկ Վենը:
Այս հետազոտությունն առաջիններից է, որում կոնցեպտուալ կերպով քննարկվում է, թե ինչպես կարող են զբոսաշրջային տպավորությունները պոտենցիալ կերպով աշխատել որպես դեմենցիայի միջամտություն:
Դոկտոր Վենն ընդգծում է, որ զբոսաշրջության բազմազան բնույթը բազմաթիվ հնարավորություններ է տալիս այնպիսի հիվանդությունների բուժման համար, ինչպիսին է դեմենցիան:
Օրինակ, նոր միջավայրերում լինելը եւ նոր տպավորությունները կարող են ապահովել ճանաչողական եւ սենսորային խթանում:
«Ֆիզիկական վարժությունները կապված են հոգեկան բարեկեցության հետ, իսկ ճանապարհորդությունները հաճախ ենթադրում են ֆիզիկական ակտիվության ավելացում, օրինակ՝ ավելի շատ քայլել»,- ասում է բժիշկ Վենը:
Մասնագետի խոսքով, կան նաեւ հիմնական պահեր, ինչպիսին են՝ մաքուր օդն ու արեւը, որոնք բարձրացնում են վիտամին D-ի եւ սերոտոնինի մակարդակը։
«Այն ամենը, ինչը միասին վերցրած իրենից ներկայացնում է ամբողջական զբոսաշրջային փորձ, թույլ է տալիս հասկանալ, թե ինչ օգուտ կարող է տալ զբոսաշրջությունը դեմենցիայով պացիենտներին»,- ընդգծել է նա:
