Տպել
Կանաչ հնդկաձավարն ավելի օգտակար հատկություններ ունի, քան «սովորականը», ինչպես հաստատում է սննդաբան Յուլյա Պոլովինսկայան (Ռուսաստան):
«ՌԻԱ Նովոստի»-ի փոխանցմամբ՝ ջերմային մշակման բացակայությունը կանաչ հնդկաձավարն ավելի օգտակար է դարձնում, քանի որ այդ գործընթացի ժամանակ հացահատիկը կորցնում է վիտամինները։
Մասնագետի խոսքով՝ կանաչ հնդկաձավարը հարուստ է բջջանյութով, որը բարելավում է մարսողության գործընթացը եւ հեշտությամբ յուրացվում է օրգանիզմի կողմից։ Բացի այդ, կանաչ հնդկաձավարը պարունակում է հակաօքսիդանտներ, վիտամիններ եւ հանքանյութեր, որոնք դրականորեն են ազդում իմունային համակարգի եւ ընդհանրապես օրգանիզմի վրա, ինչպես նաեւ դանդաղեցնում են ծերացման գործընթացը:
Ինչպես նշել է սննդաբանը, կանաչ հնդկաձավարը նաեւ նորմալացնում է արյան մեջ հեմոգլոբինի մակարդակը։
«Հիանալի մթերք նիհարելու համար, հագեցնում է, բարելավում է նյութափոխանակությունը։ Զգուշությամբ պետք է օգտագործեն աղեստամոքսային տրակտի հիվանդություններ ունեցող մարդիկ, քանի որ այն մեծացնում է աղիներում գազերի առաջացումը»,- ասել է մասնագետը։
