Տպել
ՀայՄեդիա.am-ի զրուցակիցն է Երևանի պետական համալսարանի ուսանողական խորհրդի նախագահ Արմեն Խաչիկյանը:
– Ակադեմիական տարկետման իրավունքի պահպանման պահանջով մի խումբ ուսանողներ, այդ թվում՝ ԵՊՀ ուսանողներ, երեկվանից դասադուլ են սկսել և հավաքներ են անցկացնում: Եթե հարցի առնչությամբ ԵՊՀ ուսանողական խորհուրդն արդեն ունի դիրքորոշում, կխնդրեի ներկայացնել, իսկ եթե ոչ, հետաքրքիր է Ձեր անձնական տեսակետը:
-Ուսանողական խորհուրդը դեռևս պաշտոնական դիրքորոշում չի արտահայտել, քանի որ ուսանողական շրջանակները շատ լայն են, համալսարանում ավելի քան 17 հազար ուսանողներ կան, իսկ խնդրի առնչությամբ բողոքի ակցիաներին մասնակցում են իմ տվյալներով մոտ 400 ուսանողներ: Ուսանողների իրավունքների պաշտպանության գործառույթի շրջանակներում մենք՝ ուսանողնական խորհրդի ներկայացուցիչներս, քննարկել ենք ուսանողների բողոքները: Բայց պետք է նշեմ, որ բողոքի ակցիային մասնակցող ուսանողների շրջանում կան տարբեր տեսակի, հասարակական տարբեր ակտիվության, տարբեր կրթական ցենզ ունեցող մարդիկ, և մենք փորձում ենք բոլորին լսել ու հասկանալ` որն է նրանց իրական պահանաջը:
Ուսխորհրդի վերջնական դիրքորոշումը կկարողանամ հայտնել այն ժամանակ, երբ բոլոր ուսանողական կառույցներից, ֆակուլտետային խորհուրդներից ստանանք վերջնական դիրքորոշում և հստակ իմանանաք, այնտեղ ինչ իրավիճակ է, քանի որ ֆակուլտետներ կան, որ ընդհանրապես հետաքրքրված չեն այս հարցում: Երբ ամբողջական պատկեր ունենանք, դիրքորոշում կհայտնենք:
Իմ դիրքորոշումը հետևյալն է՝ միանշանակ գիտության զարգացման հետ կապել տարկետման իրավունքի վերացումը, ճիշտ չէ: Միևնույն ժամանակ կան մարդիկ, ովքեր կարող են խնդիրներ ու դժվարություններ ունենալ կրթության ու զինծառայության համատեղման առումով: Ոչինչ բացառված չէ: Անձնական օրինակով կարող եմ ասել, որ ես ավարտել եմ ԵՊՀ Սոցիոլոգիայի ֆակուլտետի բակալավրիատը, ծառայութան եմ անցել բանակում, և, ի դեպ, այս ցույցի կազմակերպիչ Դավիթ Պետրոսյանի հետ ծառայել նույն վաշտում, որից հետո վերադարձել եմ, շարունակել կրթությունս մագիստրատուրայում, հիմա էլ ասպիրանտուրայում: Եվ գոնե ինձ ու իմ շատ ընկերներին չի խանգարել ծառայությունը: Բայց գուցե կլինեն մարդիկ, ում կխանգարի: Չեմ կասկածում, որ այս օրենքի նախագիծն առաջարկողները պրոֆեսիոնալ մարդիկ են, ու բացի այդ էլ՝ ՊՆ-ը կարող է ընդունել ռազմավարական որոշումներ ու կատարել քայլեր՝ մեկնաբանություն չտալով, քանի որ այնտեղ շատ հարցեր հրապարակային չեն: Վստահ եմ, որ այս հարցի առնչությամբ ևս կան արգումենտներ, որոնք ռազմավարական նշանակության ունեցող հարցեր են և հեռահար նպատակներ ունեն, որոնք հասարակ քաղաքացուն հասանելի չեն: Որպես ռազմական սոցիոլոգիայի գիտական հետաքրքրություն ունեցող անձ կարող եմ ասել, որ ռազմական ոլորտում ժողովրդավարության սկզբունքներ դնելուն այդքան էլ համամիտ չեմ:
-Ներկայումս որքա՞ն է այն ուսանողների թիվը, ովքեր օգտվում են ակադեմիական տարկետման իրավունքից:
-Ասպիրանտուրա ընդունվում է տարեկան միջինում 100-140 ուսանող, այդ թվում աղջիկները և այն տղաները, ովքեր ծառայությունից հետո են շարունակում ասպիրանտական կրթությունը: Կարծում եմ՝ խոսքը առավելագույնը 100 ուսանողի մասին:
-Երեկվանից խոսվում է, որ ռեկտորատը փորձում է ճնշումներ գործադրել դասադուլին մասնակցող ուսանողների նկատմամբ, ֆակուլտետային մասնաշենքերի դռներն է փակում և այլն: Այս լուրերը համապատասխանո՞ւմ են իրականությանը:
-Անկախ նրանից, թե ուսանողներն ինչ պահանջ են դնում, ուսանողի դեմ ուղղված ցանկացած քայլի և նրանց իրավունքի ցանկացած խախտման ժամանակ ես անմիջապես համապատասխան քայլեր եմ ձեռնարկում: Սակայն որևէ ուսանողի նկատմամբ ճնշում, նկատողություն և նման խնդիր դեռ չի բարձրացվել: Միևնույն ժամանակ ուզում եմ ասել, որ հետևելով ակցիայի ընթացքին, նկատել եմ, որ որևէ ոստիկան կամ պաշտոնյա չի խանգարում հավաքներին: Չնայած, եթե օբյեկտիվորեն նայենք, այդ հավաքը խանգարում է դասապրոցեսին, սակայն դրա համար ուսանողներին չեն ճնշում:
-Այսինքն դռներ չեն փակվե՞լ ուսանողների առաջ:
-Ինձ հայտնել են, որ փակված դռներ եղել են, թեև չգիտեմ՝ դա որքանով է ճշմարտացի: Սակայն ճնշումների ու արգելքների առումով կարող եմ ասել, որ ես՝ որպես ուսխորհրդի նախագահ, որևէ արգելք չեմ դրել խորհրդի անդամների նկատմամբ, և մեր անդամներից կան մարդիկ, ովքեր մասնակցում են դասադուլին: Որովհետև մի կողմից ես դրական եմ համարում, որ ուսանողության շրջանում քաղաքացիական հասարակության դրսևորումներ լինեն: Ուսանողությունը պետք է հասուն ու քաղաքացիական մտածողություն ունեցող լինի:
Գոհար Ավետիսյան
