Տպել
Այսօր ածխաջրերն ընդունված է բաժանել 2 հիմնական խմբի՝ «պարզ» և «բարդ»: Առողջության համար առավել օգտակար են համարվում վերջինները. դրանք դանդաղ են յուրացվում, արյան մեջ գլյուկոզայի բարձրացում չեն առաջացնում և ապահովում են կուշտ լինելու երկարատև զգացում:
Ձեր ուշադրությանն ենք ներկայացնում մի քանի մթերքներ, որոնք պարունակում են «բարդ» ածխաջրեր և առողջության համար օգտակար են:
Հնդկաձավար
Հնդկաձավարը ոչ միայն ածխաջրերի լավ աղբյուր է, այլև բջջանյութի, որն անհրաժեշտ է նորմալ մարսողության համար և օգնում է երկար ժամանակ կուշտ լինելու զգացում ունենալ: Հենց այս պատճառով հնդկաձավարը ամենակարևոր մթերքներից մեկն է նրանց համար, ովքեր ցանկանում են նիհարել կամ քաշը պահպանել:
Վարսակ
Վարսակի մեջ 5 անգամ ավելի շատ են ածխաջրեր պարունակվում, քան սպիտակուցներ: Չնայած դրան, վարսակի շիլան բոլորի, անգամ նիհարողների համար նախաճաշի լավ տարբերակ է: Վարսակի մեջ պարունակվող բջջանյութը օգնում է նվազեցնել արյան մեջ խոլեստերինի մակարդակը և որպես հետևանք՝ նվազում է սիրտ-անոթային հիվանդությունների հավանականությունը:
Եգիպտացորեն
Եգիպտացորենը ածխաջրերի ևս մեկ լավ աղբյուր է, սակայն այն պետք է օգտագործել առանց յուղի և աղի նվազագույն քանակությամբ: Եգիպտացորենը նաև հարուստ է բջջանյութով, յոդով, ֆոսֆորով, մագնիումով, կալցիումով և երկաթով:
Պատիճավոր լոբի
Պատիճավոր լոբին քիչ կալորիաներ ունի, բայց դրա հետ մեկտեղ պարունակում է օգտակար «բարդ» ածխաջրեր, բջջանյութ, ինչպես նաև մի փոքր սպիտակուց: Լոբին հոյակապ մթերք է նրանց համար, ովքեր ձգտում են պահպանել քաշն ու առողջությունը:
Սիսեռ
Սիսեռի մեջ մեծ քանակությամբ «բարդ» ածխաջրեր են պարունակվում: Այն նաև պարունակում է մեծ քանակությամբ բուսական բջջանյութ, որը բարելավում է աղիքների միկրոֆլորայի վիճակը և արագացնում օրգանիզմից ավելորդ խոլեստերինի դուրսբերումը: Դրանից բացի, սիսեռը հարուստ է մանգանով, որը խոչընդոտում է վաղաժամ ծերացումը:
