Տպել
Վանեցյանի վերջին ելույթին, այն մեսիջներին, որոնք կային, քչերը ուշադրություն դարձրեցին: Այս մասին այսօր հրավիրված ասուլիսի ընթացքում ասաց ArmNews FM-ի տնօրեն Լիլիթ Թումանյանը՝ անդրադառնալով ԱԱԾ նախկին տնօրեն Արթուր Վանեցյանի քաղաքականությամբ զբաղվելու և կուսակցություն ստեղծելու մտադրությանը:
Թե ինչ պայմանավորվածությունների մասին է խոսքը՝ Թումանյանն ասաց, որ սովորաբար բոլոր երկրներում, որտեղ տեղի է ունենում հեղաշրջում, հեղափոխություն և իշխանափոխություն, հաճախ հնարավոր է տեսնել, որ իշխանության գալուց հետո ուժը որոշակի գայթակղություն է ունենում ոչ թե իրականացնել այն խոստումները, որոնք տվել է ժողովրդին, այլ արագ յուրացնել բոլոր հնարավորություններն ու գործիքակազմերը, որոնք ընձեռնում է իշխանությունը:
Նա ասաց նաև, որ այս ենթադրությունը հաստատում է այն փաստը, որ Վանեցյանն իր խոսքում ասաց Ռոբերտ Քոչարյանի գործի վերաբերյալ, որ խափանման միջոց կալանքը չափազանցված է և չարդարացված:
«Սա նույնպես հաստատում է այն, որ բազմաթիվ պրոցեսներ կան, որոնց մեջ փորձել են ներքաշել ուժային կառույցներին և դրան ընդդիմացել է Վանեցյանը: Հաջորդ կարևոր բանը, որ ասաց Վանեցյանը, դա ՀԿ-ների և քաղհասարակության մասին հատվածն էր, այստեղ նույնպես առանց անուններ տալու, առանց շատ բաց տեքստով խոսելու՝ ինքը կարողանում է մեզ հասցնել այն միտքը, որ կան որոշակի վտանգներ ու սպառնալիքներ ազգային օրակարգում և դրանք ՀԿ-ներն են, քաղհասարակությունն է, որը մինչև օրս մերը չի եղել : Բացի դրանից, բոլոր այն մարդիկ որոնք որ ներգրավված են եղել այդ ոլորտում, այսօր իշխանության մաս են կազմում և մենք անհրաժեշտություն ունենք ստեղծելու սեփական ազգային օրակարգով հասարակական կազմակերպությունների՝ քաղհասարակության սեկտոր, ինքը լծվելու է այդ գործին»,- ասաց Թումանյանը և հավելեց, որ Վանեցյանի կողմից արված հաջորդ կարևոր դիտարկումը կուսակցություն հիմնելու և քաղաքականություն մուտք գործելն էր:
«Առայժմ Վանեցյանն իր կերպարի մեջ է որպես ուժային կառույցի նախկին ներկայացուցիչ, իրեն թույլ չի տալիս խոսել ավելորդություններ, տալ անուններ, բացահայտել ավելորդ տեղեկատվություն: Ինքն իրեն դա թույլ չի տալիս անել, բայց դա իրենից պահանջելու է ընտրազանգվածը, այն ընտրազանգվածը, որը որ հիասթափվել է որոշակի չկատարված խոստումներից, բայց դեռ համարում է իրեն այդ թիմի նախկին մասնակից: Իսկ որ հենց դա է նրա ընտրազանգվածը, նա նույնպես մեզ հուշեց՝ ասելով որ վերադարձ հնին չի լինելու: Նա ասաց, որ շարունակում է լինել հեղափոխության արժեքների կրողը, մարդ, որ հիասթափվել է ներկայի իշխանությունից, բայց ոչ հեղափոխության արժեքներից և պատրաստ է տանել առաջ այդ հեղափոխության արժեքները: Նշանակում է՝ իր ընտրազանգվածն այն մարդիկ են, որոնք հիասթափվել են Փաշինյանից և այսօր ինքը կոչ է անում լինել իր կողքին:
