Տպել
Մաշկաբանը՝ սոլյարիի վնասակար հատկությունների մասին
Սոլյարիի միջոցով արևայրուք ստանալը հատկապես վերջին տարիներին երիտասարդ աղջիկների շրջանում մեծ տարածում ունի: Միաժամանակ, հնչում են կարծիքներ, թե այն կարող է տարբեր հիվանդությունների պատճառ դառնալ, ընդհուպ մինչև քաղցկեղ առաջացնել:
Life.panorama.am-ը սոլյարիի վնասակար հատկությունների, ինչպես նաև ճիշտ դոզավորման և թույլատրելի հաճախելիության մասին խոսել է մաշկաբան Կարեն Վարդանյանի հետ:
«Ցանկացած բժշկական պրոցեդուրա պետք է արվի ճիշտ ճանապարհով և խելացի մասնագետի կողմից: Ճիշտ և գրագետ կիրառման դեպքում սոլյարիի վնասակար լինելու հավանականությունը մոտ է զրոյի: Սակայն կիկնում եմ՝ ամբողջ հարցը կայանում է նրանում, թե ինչպես է այն կատարվում: Ցանկացած դեպքում, երբ մարդը դիմում է համապատասխան մասնագետի՝ սոլյարիի միջոցով արևայրուք ունենալու պահանջով, պետք է հասկանալ՝ այդ մարդը արդյոք ունի հակացուցումներ, որոնք իրենց հերթին լինում են բացարձակ և հարաբերական»,- նշեց մաշկաբանը և խոսեց հակացուցումների մասին.
«Մարդը կարող է ունենալ որոշակի հորմոնալ տեղաշարժեր, որոնք առաջ են բերում մաշկի պիգմենտացիոն խանգարումներ: Օրինակ՝ հնարավոր է, որ նա դեղորայք է օգտագործել և ուլտրամանուշակագույն ճառագայթների նկատմամբ ունի մաշկի զգայունությունը բարձրացնող հատկություն: Սոլյարին կարող է խիստ վնասակար հետևանք ունենալ, եթե մաշկի վրա կան չպարզված գոյացություններ, որոնց վերաբերյալ էլ համապատասխան մասնագետի կողմից չկան անհրաժեշտ եզրակացություն: Այս պարագայում, եթե գրագետ աշխատանք չի տարվում, ապա կարող են առաջ գալ բավականին լուրջ ու վնասակար կողմնակի երևույթներ, այդ թվում որոշակի գոյացությունների չարորակացում և այլն: Միաժամանակ, նույն խնդիրները կարող են առաջանալ ծովափին ոչ ճիշտ կազմակերպված բնական արևայրուք ստանալիս, եթե կրկին նախապես տեղյակ չլինենք մեր օրգանիզմում առկա խնդիրների մասին»,- հավելեց մասնագետը:
Ըստ Կարեն Վարդանյանի՝ շատ դեպքերում հաճախորդները քաջատեղյակ չեն, թե սոլյարիի դիմելով, ի՞նչ է արվում իրենց օրգանիզմի հետ: Հաճախորդը պետք է խորհրդակցելուց զատ նշի իր առողջական կամ կոսմետիկ խնդիրները, դրանից հետո պարզի՝ արդյոք դրանք հակացուցում են հանդիսանում և հետո նոր որոշում կայացնի՝ ուզում է դիմել սոլյարիի, թե ոչ: Նրա խոսքով, սակայն, միշտ չէ, որ այցելուները այդքան խորը ուսումնասիրում և հետաքրքրվում են իրենց առողջությամբ, հետևաբար տվյալ սրահի սոլյարիի մասնագետը պարտավոր է այնքան պրոֆեսիոնալ լինել, որ իր հարցերի միջոցով հասկանա, թե արդյոք տվյալ հաճախորդն ունի բացարձակ կամ հարաբերական հակացուցում:
Անդրադառնալով սոլյարիից հետո մաշկի վրա առաջացած ցաներին՝ Կարեն Վարդանյանը նշեց.
«Սոլյարիից հետո առաջացած մաշկի ցաները տարբեր պատճառներ կարող են ունենալ: Օրինակ՝ հնարավոր է, որ տվյալ անձը որոշակի սննդամթերք կամ դեղորայք է օգտագործել, որոնք մասնավորապես ուլտրամանուշակագույն ճառագայթների նկատմամբ մաշկի զգայունության բարձրացման են բերում, որից էլ առաջանում է ֆոտոդերամտոզ, իսկ սրանք էլ ծայրահեղ դեպքում կարող են վերածվել այրվածքների: Սակայն այս խնդիրներից էլ կխուսափենք, եթե մասնագետը նախապես հարցնի, թե հաճախորդը ինչ է կերել, ինչ դեղորայք է օգտագործել, կամ թե ունեցել է արդյոք պիգմենտացիոն խնդիրներ»:
Անդրադառնալով սոլյարիի ճիշտ դոզավորմանն ու հաճախելիության թույլատրելի քանակին, մաշկաբանը շեշտեց.
«Թե բնական, թե արհեստական արևայրուքի դեպքում գոյություն ունի դոզավորում: Այսինքն՝ մեր օրգանիզմում կան մելանոցիտենր, որոնք արտադրում են մելանին պիգմենտ, որն էլ ապահովում է մեր մաշկի, մազերի և աչքերի գույնը: Ուլտրամանուշակագույն ճառագայթների ազդեցությամբ խթանվում են մելանոցիտները և սկսվում են ավելի շատ մելանին արտադրել, իսկ դա օրգանիզմի պաշտպանական ռեակցիան է: Սա մաշկի գույնը մգացնելով՝ մեզ պաշտպանում է ուլտրամանուշակագույն ճառագայթներով պայմանավորված այրվածքների զարգացումից: Այսինքն՝ խորհուրդ է տրվում թե բնական, թե արհեստական արևայրուքը գրագետ կազմակերպել և սկսել քիչ դոզավորումից, իսկ մաշկի մգանալուն զուգահեռ կարելի է տևողությունն ու հաճախությունը ավելացնել»:
