Ի՞նչ տեսք ունի առաջին լողացող քաղաքը

Այն բաղկացած կլինի բազմաթիվ հարթակներից, որոնք մալուխներով խարսխված կլինեն ծովի հատակին:

Oceanix City լողացող քաղաքի շինարարությունը կսկսվի ծրագրի ղեկավարների՝ Նյու Յորքի դիզայներների Oceanix-ի կողմից ստորագրված «պատմական համաձայնագրի» շնորհիվ։ Համաձայնագիրը կնքվի Բուսան քաղաքի և ՄԱԿ-ի Մարդկային բնակավայրերի գործակալության (UN-Habitat) ներկայացուցիչների հետ: Այս մասին հաղորդում է Daily Mail-ը։ Նախագծի իրականացման աշխատանքները գնահատվում են 200 մլն դոլար։

Ինքնաբավ քաղաքը կարտադրի էլեկտրաէներգիա՝ օգտագործելով տանիքների արևային մարտկոցները, կարտադրի իր սնունդն ու քաղցրահամ ջուրը, և կղզիների բնակիչներին ֆուտուրիստական ​​նավակներով կտեղափոխի կղզիների միջև: Բնական աղետները, ներառյալ՝ ջրհեղեղները, ցունամիները և փոթորիկները, քաղաքի համար անվտանգ կլինեն, քանի որ լողացող հարթակները ամուր կառչած կլինեն ծովի հատակին:

Անհասկանալի է մնում՝ քաղաքի բնակիչները կվճարե՞ն կացարանի համար, և որքա՞ն կարող է արժենալ վարձավճարը։ Ընկերությունից հայտնել են, որ նախագծի վրա աշխատանքները դեռ շարունակվում են։ Մասնավորապես, այժմ որոշվում է, թե ինչպես են ընտրվելու բնակիչները։ Մնում է պարզել նաև առաջին արհեստական ​​կղզու ճշգրիտ վայրը, թեև, ըստ աղբյուրի, այն ամենայն հավանականությամբ կկառուցվի հարավկորեական Բուսան նավահանգստի մոտ։

Յուրաքանչյուր վեցանկյուն կղզի կծածկվի կրաքարով, որը երկու-երեք անգամ ավելի կարծր է, քան բետոնը: Բանջարեղենն ու մրգերը կաճեցվեն աերոպոնիկ և ակվապոնիկ համակարգերում, որոնք կհամալրվեն բացօթյա ավանդական տնտեսություններով և ջերմոցներով: Աերոպոնիկան բույսերի մշակումն է օդային միջավայրում՝ առանց հողի օգտագործման, իսկ ակվապոնիկան գյուղատնտեսության բարձր տեխնոլոգիական եղանակ է, որը հիմնված է երեք հիմնական պարամետրերի՝ ջրային կենդանիների, բույսերի և բակտերիաների վրա:

Քաղաքի շինարարությունը կենտրոնանալու է տեղական աղբյուրների վրա, ներառյալ՝ արագ աճող բամբուկը: Բոլոր կառույցները կունենան յոթ հարկից պակաս բարձրություն՝ ցածր ծանրության կենտրոն ստեղծելու համար: Վերջինս անհրաժեշտ է ուժեղ քամիների ժամանակ կառույցների առավելագույն կայունության համար։

Սիրարփի Աղաբաբյան