Տպել
Կորոնավիրուսային վարակը կարող է լինել տարբեր աստիճանի ծանրության։ «Կարմիր դրոշի ախտանիշները» վկայում են շտապ բժիշկ կանչելու անհրաժեշտության մասին, Sputnik ռադիոյին տված հարցազրույցում ասել է թերապևտ Ալեքսեյ Վոդովոզովը։
Սովորաբար COVID-19-ը զարգանում է «գմբեթաձև», և եթե հիվանդի վիճակի մեջ կա որևէ կտրուկ փոփոխություն, որը չի տեղավորվում այս սցենարի մեջ, ապա անձը լրացուցիչ բժշկական օգնության կարիք ունի, նշել է Վոդովոզովը:
«Ինֆեկցիան ընթանում է գմբեթավոր ձևով։ Այսինքն՝ ախտանիշները սկզբում աստիճանաբար բարձրանում են վերև, իսկ հետո աստիճանաբար իջնում։ Դա պետք է նորմալ լինի, երբ օրգանիզմն ինքնուրույն հաղթահարի։ Եթե ճանապարհին անկումներ կամ թռիչքներ լինեն, այսինքն՝ վարակի ընթացքում շատ ուժեղ շեղումներ, ապա լրացուցիչ բժշկական օգնություն կպահանջվի», – բացատրել է նա:
Ըստ թերապևտի՝ կա ախտանշանների որոշակի խումբ, որոնք վկայում են կորոնավիրուսային վարակով հիվանդի ծանր վիճակի և նրան սպառնացող վտանգի մասին։ Նրա խոսքով՝ առաջին հերթին պետք է ուշադրություն դարձնել հիվանդի շնչառությանը։
«Կա «կարմիր դրոշի ախտանշանների» մի շարք, երբ դրանք հայտնվում են, պետք է դիմել բժշկի օգնությանը: Առաջին հերթին աճում է շնչահեղձությունը: Սովորաբար մեզ մոտ շնչառության հաճախականությունը կազմում է 14-16 (րոպեում- խմբ.), եթե այն հասնում է 30-ի, ապա սա շնչահեղձության դրսևորում է։ Եթե շնչահեղձությունն ավելանում է, օդի պակաս կա, և շնչելու համար պետք է կանգ առնել, ապա դա նշանակում է, որ, ամենայն հավանականությամբ, բժշկական միջամտություն կպահանջվի»,- Sputnik ռադիոյին տված հարցազրույցում ասել է Ալեքսեյ Վոդովոզովը։
Պատվաստումը կարող է կանխել COVID-19-ի ծանր ընթացքը և նվազեցնել կորոնավիրուսով վարակվելու վտանգը, ավելացրել է թերապևտը։
