Տպել
Կլինիկական փորձարկումը, որն ուսումնասիրում է սեպսիսով երեխաների բուժման նոր միջոցները՝ վիտամին C-ի եւ հակաբիոտիկների հետ միասին ստերոիդների օգտագործմամբ, կարող է փրկել երեխաների կյանքը ամբողջ աշխարհում, գրում է News Medical Life Sciences-ը:
Քվինսլենդի համալսարանի ղեկավարած հետազոտությունը հինգ տարվա ընթացքում Առողջապահության եւ բժշկական հետազոտությունների ազգային խորհրդի կողմից 1,3 միլիոն դոլար է ստացել՝ մանկական սեպսիսի ոլորտում ամենամեծ կլինիկական փորձարկումներից մեկը սկսելու համար:
Մանկական առողջության UQ հետազոտական կենտրոնի դոցենտ Քրիստեն Գիբոնսն ասում է, որ հետազոտական խումբը ուսումնասիրում է վիտամին C-ի եւ ստերոիդների մեգադոզանների օգտագործումը հակաբիոտիկների հետ միասին՝ սեպսիսի բուժման համար, որն Ավստրալիայում մանկական մահացության հիմնական պատճառն է:
«Ամբողջ աշխարհում ամեն 10 վայրկյանը մեկ, իսկ Ավստրալիայում ամեն շաբաթ սեպսիսից մեկ երեխա է մահանում»,- ասում է դոկտոր Գիբոնսը: «Մինչ այժմ սեպսիսի բուժման համար օգտագործվում էին հակաբիոտիկները եւ օգնությունը արյան ճնշման բարձրացման դեպքում, բայց մեր ուսումնասիրությունը ցույց է տվել, որ վիտամին C-ի եւ ստերոիդների հավելումները կարող են օգնել օրգանիզմին վերականգնվել եւ թույլ տալ, որ հակաբիոտիկները կատարեն իրենց աշխատանքը»:
«Այս նոր բուժումը ոչ միայն կարող է կյանքեր փրկել, այլ նաեւ նվազեցնել որոշ երեխաների մոտ սեպսիսից հետո հետեւանքները, եւ դա կարող է իսկական աջակցություն լինել ընտանիքների համար»,- ասել է նա:
Սեպսիսը ծանր վարակ է, որը կարող է մահացու լինել եւ կարող է սկսվել որպես սովորական, թեթեւ վարակ, որը, սակայն, կարող է արագ ախտահարել ամբողջ օրգանիզմը։
UQ-ի հետազոտող եւ Քվինսլենդի մանկական հիվանդանոցի ինտենսիվ թերապիայի բժիշկ Սայնատ Ռամանը ասել է, որ հետազոտությունը սկսվել է 2015 թվականին՝ դոցենտ Լուրեն Շլապբախի գլխավորությամբ, եւ տեխնիկատնտեսական հիմնավորումներն ու փորձնական ուսումնասիրությունները ցույց են տվել, որ լայնածավալ փորձարկումը արդարացված է:
