ԱԲ-ն սովորում է կարդալ մարդկանց մտքերը

Արհեստական բանականության հետ կապված զարգացումներն օր-օրի ավելի ապշեցուցիչ են դառնում, և մարդիկ դեռ պետք է պարզեն, թե որքան լայն են ԱԲ-ի հնարավորությունները։

Սթենֆորդի համալսարանի (ԱՄՆ), Սինգապուրի ազգային համալսարանի և Հոնկոնգի չինական համալսարանի գիտնականների միջազգային թիմի կողմից վերջերս իրականացված փորձի արդյունքում պարզվեց, որ ԱԲ-ն բառացիորեն կարող է կարդալ մարդկանց մտքերը: Փորձի ընթացքում մարդկանց ցույց էին տալիս որոշակի նկարներ՝ միաժամանակ գրանցելով ուղեղի ակտիվության վերաբերյալ տվյալները։ Այնուհետև Mind-Vis ԱԲ-ն, վերլուծելով այդ տվյալները, ստեղծում էր իր պատկերները:

Նախ Mind-Vis-ն օգտագործել էր տվյալների բազա, որը պարունակում էր ուղեղի 160,000 սկանավորումներ: Իր ուսուցման երկրորդ փուլում ԱԲ-ն վերապատրաստվել էր փորձի մասնակիցների տվյալների բազայի վրա, որոնց ուղեղի ակտիվությունը գրանցել էր ՄՌՇ սարքը, երբ նրանց պատկերներ էին ցույց տվել: Այդ ամենից ելնելով՝ ԱԲ-ն սովորեց կապել ուղեղի հատուկ ակտիվությունը պատկերի տեսողական այնպիսի առանձնահատկությունների հետ, ինչպիսիք են գույնը և ձևը:

Պարզվեց, որ 84% դեպքերում ԱԲ-ն ստեղծել էր այնպիսի պատկերներ, որոնք համապատասխանում էին բնօրինակ պատկերներին այնպիսի պարամետրերով, ինչպիսիք են տեքստուրան ու գույնը։ Համընկել էին նաև ստեղծված և բնօրինակ նկարների թեմաները։

Հետազոտողները եզրակացրել են, որ ուղեղի սկանավորումը կարող է բավականաչափ տեղեկատվություն տրամադրել ԱԲ-ին՝ բավականին ճշգրիտ պատկերացում կազմելու համար, թե ինչ է մտածում մարդը: Ավելի լավ արդյունքների կարելի է հասնել, երբ նեյրոնային ցանցն անցնի երկարաժամյա ուսուցում: Այս փորձը շատերից մեկն է, որտեղ գիտնականները դիտարկել են ուղեղի ակտիվությունը և ԱԲ-ի աշխատանքը: Դեռևս երկար տարիներ և բազմաթիվ նոր հետազոտություններ կպահանջվեն, մինչև տեխնոլոգիան զարգանա այնչափ, որ հասանելի դառնա զանգվածային օգտագործման համար:

Հրապարակման պատրաստեց ita.am-ը