Տպել
NASA-ի Ռեակտիվ շարժման լաբորատորիայի (Jet Propulsion Laboratory, JPL) գիտնականները օձանման ռոբոտ (Exobiology Extant Life Surveyor, EELS) են ստեղծել: Այն նախատեսված է Երկրի, Լուսնի, Սատուրնի արբանյակի Էնցելադուսի և Արեգակնային համակարգի այլ աշխարհների դժվար հասանելի տարածքները հետազոտելու և քարտեզագրելու համար:
Ռոբոտը փորձարկվել է ավազոտ, ձնառատ և սառցե տեղանքներում։ Փորձարկումներն իրականացվել են, մասնավորապես, JPL-ի փորձադաշտում, որը նմանակում է Մարսի լանդշաֆտը, Հարավային Կալիֆոռնիայի լեռնադահուկային հանգստավայրերից մեկի՝ «ռոբոտների համար նախատեսված խաղահրապարակում», ինչպես նաև փակ սահադաշտում:
Երկրից տիեզերական սարքերի կառավարման ժամանակային մեծ ինտերվալի պատճառով EELS-ը նախագծված է այնպես, որ շատ առաջադրանքներ կարողանա կատարել ինքնուրույն, օրինակ՝ շրջակա միջավայրի նույնականացում, ռիսկերի հաշվարկ, սարքի տեղաշարժը, ինչպես նաև սենսորների միջոցով տեղեկություններ հավաքելը, թեև գործառույթների շարքը վերջնական տարբերակի դեռ որոշված չէ։ Արտակարգ իրավիճակի դեպքում ռոբոտը պետք է կարողանա ինքնուրույն վերադառնալ աշխատանքային վիճակի` առանց մարդու միջամտության:
Օձանման ռոբոտի առաջին նախատիպի վրա աշխատանքներն սկսվել են 2019-ին, դիզայնի փոփոխությունները կատարվում են մշտապես։ EELS 1.0-ի ներկայիս տարբերակն ունի 4 մ երկարություն և կշռում է մոտ 100 կգ։ Նախագծին աջակցում են Արիզոնայի պետական համալսարանի, Քարնեգի Մելոն համալսարանի և Կալիֆոռնիայի Սան Դիեգոյի համալսարանի գիտնականները: Ռոբոտը դեռ չի կցվել NASA-ի առաքելություններից որևէ մեկին։
