«Զորաց քարերում» հնագետները օձի գլխով ապարանջան են հայտնաբերել (լուսանկարներ)
Advertisement 1000 x 90

«Զորաց քարերում» հնագետները օձի գլխով ապարանջան են հայտնաբերել

«Զորաց քարեր» հուշարձանի տարածքում այս տարվա պեղումները հետաքրքիր բացահայտումներ են արել: Պեղումները հուշարձանի տարածքում «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի տնօրենի հրամանով կազմված արշավախումբը, ՊՈԱԿ-ի գիտնական-քարտուղար, պատմական գիտությունների դոկտոր, պրոֆեսոր Աշոտ Փիլիպոսյանի գլխավորությամբ, վերսկսել է օգոստոսի 16-ից:

ՊՈԱԿ-ի տնօրենի տեղակալ, արշավախմբի ղեկավարի տեղակալ Կարեն Փահլևանյանի փոխանցմամբ հնագետներն այս օրերին պեղումներ են իրականացնում հուշարձանի մի քանի հատվածներում: Բնակատեղիի հյուսիսից-հարավ ձգվող պարսպի ճարտարապետական կառուցվածքն ամբողջությամբ հասկանալու համար, պեղվել է վերջինիս մի հատվածը: Պարզվել է, որ այն թույլ հիմքերի վրա է եղել կառուցված, շատ արագ և, ըստ երևույթին, պաշտպանական նպատակ է հետապնդել: Փահլևանյանի խոսքով` պարսպի հատվածում ընթացող պեղումները հնարավորություն կտան որակական առումով էլ ավելի լավ լուսաբանել կառույցի պատմական նշանակությունը, առանձնահատկությունը:

Պեղվել է նաև հուշարձանի տարածքում առկա 30 դամբարաններից մեկը, որը մինչև ՊՈԱԿ-ի պահպանությանը հանձնելը, բազմիցս «արժանացել» է գանձագողերի, հովիվների, որսորդների ուշադրությանը:

«Սկզբում կարծում էինք, թե հետաքրքիր նյութ չենք կարողանա գտնել, սակայն, երբ սկսեցինք պեղել դամբարանի կենտրոնական հատվածը, կավե անոթներ, դանակի ու նիզակի մասեր հայտնաբերեցինք: Ըստ երևույթին դամբարանում թաղված անձը հասարակության մեջ բարձր դիրք է զբաղեցրել», –«Արմենպրես»-ի հաղորդմամբ՝ ասաց Փահլևանյանը:

Հնագետները նույն հատվածում կենդանիների ոսկորներ, ատամներ են հայտնաբերել, նաև` ժանիքներ: Փահլևանյանի խոսքով՝ ամբողջական պատկերացում կարելի է կազմել միայն նյութի մշակումից, համադրումից և լաբորատոր ուսումնասիրությունից հետո: Այս օրերին արշավախումբը նաև օձի գլխով ապարանջան, բրոնզե ուլունքներ և այլ գտածոներ է հայտնաբերել:

ՊՈԱԿ-ի տնօրենի տեղակալի փոխանցմամբ առաջիկայում հնագիտական արշավախմբին կմիանան նաև լեհ մասնագետները: