Տպել
Շաքարախտի հիվանդության դեմ պայքարում կարևոր դեր է խաղում միջազգային համագործակցությունը, փորձի փոխանակումը, օրենքների և բժշկական գործընթացների սինքրոնացումը: Այս մասին «Շաքարախտով հիվանդացության աճի դեմ պայքարում ԱՊՀ պետությունների համագործակցության մասին» համաձայնագրի վավերացման մասին քննարկման ընթացքում ասաց ՀՀ առողջապահության նախարարի տեղակալ Անահիտ Ավանեսյանը:
Նրա խոսքով՝ այդ համաձայնագիրը դեռ 2008 թվականի նոյեմբերին ստորագրել են մի շարք երկրներ, այդ թվում Հայաստանը, Բելառուսը, Ղրղզստանը, Մոլդովան, Տաջիկստանը, Ուկրաինան, Ռուսաստանն ու Ուզբեկստանը:
Վերջին մեկ տարում հայկական կողմը մասնակցել է շատ քննարկումների, համաժողովների՝ նվիրված այդ համաձայնագրին, և հասկանալի է դարձել, որ կարելի է վերսկսել աշխատանքը այդ ուղղությամբ և վերջապես վավերացնել համաձայնագիրը:
Համաձայնագրի շրջանակում երկրները պարտավորվում են միջոցներ ձեռնարկել՝ ուղղված շաքարախտի խնդրի հարցով ազգային օրենսդրության կատարելագործմանը, շաքարախտի կանխարգելման ոլորտում համալիր ծրագրերի հաստատմանն ու մշակմանը:
Բացի այդ, կողմերը պարտավորվում են անհրաժեշտության դեպքում համաձայնագրի մասնակից պետություններին անհրաժեշտ բժշկական օգնություն ցուցաբերել առանց ծախսերի փոխադարձ հատուցման:
Փոխնախարարը հիշեցրեց, որ շաքարախտը լուրջ խնդիր է աշխարհի բոլոր երկրներում, և Հայաստանը բացառություն չէ: Այն մահացության թվով, իհարկե, զիջում է քաղցկեղի կամ սրտանոթային հիվանդություններին, սակայն ունի բացասական ազդեցություն և հաճախ հանգեցնում է հաշմանդամության:
