Տպել
Արյան երկրորդ խումբ ունեցողները COVID-19-ի հանդեպ ավելի ընկալունակ են և ավելի հաճախ են հիվանդանոցում հայտնվում ծանր ինֆեկցիայով: Արյան առաջին խմբի դեպքում, հակառակը, վարակման հավանականությունը փոքր է: Սա պարզելու համար Քրիստիան-Ալբերտի համալսարանի գիտնականները վերծանել են Իսպանիայի և Իտալիայի 1980 բնակիչների գենոմը, որոնք հիվանդանոցում են եղել կորոնավիրուսային ինֆեկցիայի ծանր ձևով:
Ամեն ինչի համար «մեղավոր» են հատուկ մուտացիաները, փոխանցում է ՏԱՍՍ-ը: հետազոտողները պացիենտների գեներում մուտացիաների լրակազմերը համեմատել են արյան տարբեր խմբերի հետ: Ընդհանուր առմամբ, առանձնացվել է ավելի քան 8,5 մլն գենետիկ տարբերակ: Դրանց առկայությունը փորձել են կապել կորոնավիրուսային ինֆեկցիայով վարակման հավանականության և դրա ընթացքի բնույթի հետ:
Պարզվել է, որ վարակման հավանականության և հիվանդության բնույթի վրա ավելի շատ ազդել են երկու մուտացիաներ. առաջինը՝ SLC6A20 գենի և երրորդ քրոմոսոմի, իսկ երկրորդը՝ արյան խումբը որոշող գենի և իններորդ քրոմոսոմի: Առաջին մուտացիան վարակման դեպքում բարդությունների զարգացման հավանականությունը մեծացրել է շուրջ 1,77 անգան, իսկ երկրորդ մուտացիան՝ վարակման հավանականությունը մեծացրել է 1,32 անգամ:
Ինչպես հայտնի է, SLC6A20 գենն ուղղակիորեն կապված է ACE2 ռեցեպտորների աշխատանքի հետ, որը նոր կորոնավիրուսն օգտագործում է մարդու բջիջների մեջ թափանցելու համար: Դրանից բացի, այս մուտացիաների հետևանքով իններորդ քրոմոսոմում սովորաբար մեծանում է արյան մակարդելիությունը, որն, ինչպես հայտնի է, հաճախ հանգեցնում է COVID-19-ով պացիենտների մահվանը: Իսկ այսպիսի մուտացիաները ավելի հաճախ են հանդիպում արյան երկրորդ խումբ ունեցողների մոտ, նշում են գիտնականները:
