Տպել
Խոլեստերինը ճարպանման նյութ է և համարվում է այն հիմնական բաղադրիչներից մեկը, որոնք օգնում են մարմնին տեղծել առողջ բջիջներ ու հորմոններ արտազատել: Սա շատ կարևոր նյութ է, սակայն դրա մակարդակի բարձրացումը կարող է շատ վտանգավոր խնդիրների, այդ թվում՝ սրտի հիվանդությունների ու գլխուղեղի կաթվածի զարգացման պատճառ դառնալ: Սա պայմանավորված է նրանով, որ խոլեստերինի բարձր մակարդակի դեպքում դրա մասնիկները կուտակվում են անոթներում և հանգեցնում են խցանման՝ խանգարելով արյան շրջանառությունը: Նման խնդիրներից խուսափելու համար հարկավոր է վերահսկողության տակ պահել խոլեստերինի մակարդակն ու խուսափել դրա բարձրացումից, սակայն առաջին հերթին հարկավոր է հիշել, որ գոյություն ունի խոլեստերինի երկու տեսակ, որոնք տարբեր կերպ են ազդում օրգանիզմի վրա:
Առաջին տեսակը ցածր խտության լիպոպրոտեիններն են կամ «վատ» խոլեստերինը, որն էլ կուտակվում է անոթային պատերի վնասված հատվածներում՝ առաջացնելով խցանումներ, մինչդեռ երկրորդ տեսակը բարձր խտության լիպոպրոտեիններն են կամ «լավ» խոլեստերինը, որը կապվում է «վատ» խոլեստերինի առաջացրած վահանիկներին ու դուրս է բերում դրանք օրգանիզմից: Այսպիսով՝ օրգանիզմի համար վնասակար են համարվում ցածր խտության լիպոպրոտեինները, որոնց մակարդակն էլ հենց հարկավոր է նվազեցնել անհրաժեշտության դեպքում:
Խոլեստերինի մակարդակի ախտաբանական բարձրացման դեպքում հիվանդներին հաճախ խորհուրդ է տրվում կարգավորել կենսակերպը, այդ թվում նաև վերանայել ամենօրյա սննդակարգը՝ հարստացնելով այն մեծ քանակությամբ օգտակար մթերքով ու նվազեցնելով վնասակար մթերթի գործածությունը։ Մայո կլինիկայի մասնագետները նման խնդրի դեպքում խորհուրդ են տալիս մշտական սննդակարգի մասը դարձնել հինգ մթերք, որոնք համարվում են լավագույններն արյունատար անոթներում կուտակված ավելորդ ճարպերի դեմ պայքարելու համար։ Դրանք են․
- վարսակի փաթիլներն ու թեփը,
- գետնանուշն ու ընկույզները (հունական ընկույզ, նուշ և այլն),
- ձուկը (սկումբրիա, տառեխ, սարդինա, սաղմոն և այլն),
- ձիթատղի յուղը,
- բուսական ստանոլներ ու ստերոլներ՝ խոլեստերինի ներծծումն արգելակող նյութեր պարունակող մթերքը (լոբազգիներ, ամբողջական հացահատիկ, նարինջ և մի շարք այլ մրգեր ու բանջարեղեն)։
